ബെഡ്റൂമിൽ സൗകര്യം കൂട്ടാം

കിടപ്പുമുറിയിൽ സൗകര്യങ്ങളില്ലേ? ചെറിയൊരു പുതുക്കലിലൂടെ ബെഡ്റൂം പുതിയൊരു ലോകമാക്കാം.

- സുമി റാണി ഇന്റീരിയർ ഡിസൈനർ GOLD HAUS DESIGN - STUDIO, കൊച്ചി

പുതുമയും പുതുക്കലുകളുമൊക്കെ എപ്പോഴും നല്ലതാണ്. അതിവേഗം മാറുന്ന കാലഘട്ടത്തിന്റെ ആവശ്യം കൂടിയാണ് പുതുക്കലുകൾ. പത്തോ പതിനഞ്ചോ വർഷം മുൻപ് നിർമിച്ച വീട്ടിൽ പോലും ഇപ്പോഴത്തെ വീടുകളിലുള്ള സൗകര്യങ്ങൾ മിക്കതും ഉണ്ടായിരിക്കില്ല. പുതുക്കിപ്പണിയൽ മാത്രമാണ് ഇതിനൊരു പരിഹാരം.

വിവാഹം പോലുള്ള മംഗളകാര്യങ്ങൾ വരുമ്പോഴാണ് ബെഡ്റൂമിൽ സൗകര്യങ്ങൾ വർധിപ്പിക്കുന്നതിനെക്കുറിച്ച് ആലോചിക്കുക. കിടപ്പുമുറിയിലെ സൗകര്യങ്ങൾ കൂട്ടാൻ പലപ്പോഴും പൂർണമായ പൊളിച്ചുപണിയൽ ആവശ്യമുണ്ടാകില്ല. ഫർണിച്ചറോ ഫർണിഷിങ്ങോ മാറ്റിയാൽപ്പോലും ആഗ്രഹിച്ച രീതിയിൽ മാറ്റിയെടുക്കാം. ചിലപ്പോൾ മുറിയുടെ വലുപ്പം കൂട്ടുകയോ പുതിയ വാഡ്രോബ് നിർമിക്കുകയോ വേണ്ടിവരും.

കൃത്യമായ പ്ലാനിങ്ങുണ്ടെങ്കിൽ എത്ര വലിയ പണിയാണെങ്കിലും വൃത്തിയായി പ്രാവർത്തികമാക്കാം. ഇത് ജീവിതം കൂടുതൽ അനായാസവും സന്തോഷകരവുമാക്കും.

ആദ്യഘട്ടം ആലോചന

പഴയ ബെഡ്റൂമിൽ എന്തെങ്കിലും കുറവുണ്ട് എന്ന തോന്നൽ ഉണ്ടാകുന്നതു കൊണ്ടാണല്ലോ പുതുക്കുക എന്ന ചിന്തയിലേക്ക് എത്തുന്നത്. ആ കുറവുകൾ എന്തെല്ലാമാണെന്ന് തിരിച്ചറിഞ്ഞ് എഴുതി വയ്ക്കുകയാണ് പുതുക്കലിന്റെ ആദ്യഘട്ടം. ഉപയോഗക്ഷമതയിലും സൗന്ദര്യപരമായ ഘടകങ്ങളിലും എന്തെല്ലാം വ്യത്യാസങ്ങൾ ആഗ്രഹിക്കുന്നുണ്ട് എന്നത് കൃത്യമായി അറിയുന്നത് വളരെ നല്ലതാണ്.

ചില ആളുകൾക്ക് കിടപ്പുമുറി അടിമുടി മാറ്റേണ്ടി വരും. അതായത്, സീലിങ് മുതൽ ഫ്ലോറിങ് വരെ. ചിലർക്ക് ഏതെങ്കിലും പ്രത്യേകമൊരു ഘടകം മാത്രം പുതുക്കുകയോ പുതുതായി കൂട്ടിച്ചേർക്കുകയോ വേണ്ടിവരും. അത്തരം കാര്യങ്ങളിലെല്ലാം എന്തുവേണമെന്നതിൽ വ്യക്തത വേണം.

വിശദമായ മാറ്റമാണെങ്കിൽ കട്ടിൽ, കട്ടിലിന്റെ ഹെഡ്ബോർഡ്, വാഡ്രോബ്, ഡ്രസ്സിങ് യൂണിറ്റ്, സ്റ്റഡി ഏരിയയിലേക്കുള്ള സൗകര്യങ്ങൾ എന്നിവയാണ് സാധാരണയായി കിടപ്പുമുറിയിൽ ഒരുക്കേണ്ടിവരിക. സീലിങ്, ഫ്ലോറിങ്, ഭിത്തിയിലെ പെയിന്റ്, ഇലക്ട്രിക്കൽ വർക്കും ലൈറ്റിങ്ങും, ബാത്രമിൽ എന്തെങ്കിലും മാറ്റം വരുത്തുകയാണെങ്കിൽ പ്ലമിങ് എന്നിവയും മാറ്റേണ്ടിവരും.

ഇത്രയുമായാൽ വീട്ടുകാരെ സംബന്ധിച്ച് ചെയ്യേണ്ട കാര്യങ്ങളിൽ വ്യക്തത വരും. ഇത് എങ്ങനെ പ്രാവർത്തികമാക്കണം എന്നതാണ് അടുത്ത ഘട്ടം.

ഓരോ ഘട്ടവും പ്രധാനം