ഒക്യുലോപ്ലാസ്റ്റി നേത്രചികിത്സയിലെ നൂതനമാർഗങ്ങൾ

കണ്ണുകളുടെ അഴകും ആരോഗ്യവും വർധിപ്പിക്കുന്നതിനുള്ള ശാസ്ത്രീയ മാർഗങ്ങളാണ് ഒക്യുലോപ്ലാസ്റ്റി ചികിത്സകൾ

- ഡോ.അഞ്ജുചന്ദ്രൻ.വി

നേത്രചികിത്സാരംഗത്ത് പ്രാധാന്യവും പ്രസക്തിയും വർധിച്ചു വരുന്ന ഒരു ശാഖയാണ് ഒക്യുലോപ്ലാസ്റ്റി.

കണ്ണിന്റെ ആകൃതിയുമായി ബന്ധപ്പെട്ട തകരാറുകൾ ശസ്ത്രക്രിയയിലൂടെ പരിഹരിക്കുന്ന ചികിത്സാരീതിയാണിത്. കൺപോളകൾ, നേത്രഗോളം, കണ്ണിനു ചുറ്റുമുള്ള അസ്ഥികൾ, കണ്ണുനീർ ഗ്രന്ഥി, കണ്ണുനീർ ഒഴുകിപ്പോകുന്ന നാളികൾ മുതലായവയ്ക്കുണ്ടാകുന്ന ഘടനാപരമായ പ്രശ്നങ്ങൾ പരിഹരിക്കാനുള്ള വൈദ്യശാസ്ത്ര വിഭാഗമാണിത്. ഒരു നിലയ്ക്ക് പറഞ്ഞാൽ കണ്ണുകൾക്ക് ചെയ്യുന്ന പ്ലാസ്റ്റിക്സർജറി തന്നെ. കണ്ണുകളെ ബാധിക്കുന്ന രോഗങ്ങൾ കൊണ്ടോ കണ്ണുകൾക്ക് പരിക്കു പറ്റുന്നതു മൂലമോ ഉണ്ടാകുന്ന വൈകല്യങ്ങൾ,കണ്ണിന്റെ സൗന്ദര്യസംബന്ധമായ പ്രശ്നങ്ങൾ ഇവയൊക്കെ പരിഹരിക്കാൻ ഈ ചികിത്സാരീതികൾ പ്രയോജനപ്പെടുത്തി വരുന്നു. ഒക്യുലോപ്ലാസ്റ്റി ചികിത്സകൾ ഗുണകരമാകുന്ന ചില രോഗാവസ്ഥകളെക്കുറിച്ച് സൂചിപ്പിക്കാം.

ഇടിഞ്ഞ കൺപോളകൾ

കൺപോളകൾ താഴേക്ക് തുങ്ങിനിൽക്കു ന്ന അവസ്ഥയെ ടോസിസ് എന്ന് പറയുന്നു. പോളകൾ കൃഷ്ണമണിയെ പകുതിയിലധികം മറച്ചുവയ്ക്കുന്ന തരത്തിലാണെങ്കിൽ ക്രമേണ കാഴ്ചക്കുറവ് അനു ഭവപ്പെടാം. കുട്ടികളിൽ കണ്ടുവരുന്ന ടോസിസ് പലപ്പോഴും ജന്മനാ ഉള്ളതാകാം. കൂടാതെ, പ്രായാധിക്യം കൊണ്ടോ പരിക്കുകൾ മുലമോ കണ്ണിന്റെ പേശികൾ, നാഡികൾ എന്നിവയുടെ തളർച്ച കൊണ്ടോ ഒക്കെ ഇത് സംഭവിക്കാം. കൃത്യമായ കാരണം കണ്ടെത്തി മരുന്നുകൾ ഉപയോഗിച്ചോ ശസ്ത്രക്രിയയിലൂടെയോ ഇത് വലിയൊരു പരിധി വരെ പരിഹരിക്കാൻ സാധിക്കും. ശസ്ത്രക്രിയ ചെയ്യുന്ന രീതിയാകട്ടെ, വ്യക്തിഗതമായ പ്രത്യേകതകളെ അടിസ്ഥാനപ്പെടുത്തിയാണ് നിശ്ചയിക്കുക. പൊതുവായി പറഞ്ഞാൽ, കൺപോളകളെ യഥാസ്ഥാനത്ത് നിലനിർത്താൻ സഹായിക്കുന്ന ലിവേറ്റർ പേശികളെ ശക്തിപ്പെടുത്തുകയാണ് ശസ്ത്രക്രിയയിലൂടെ ചെയ്യുന്നത്. ഈ പേശികളെ ബലപ്പെടുത്തുന്നതോടെ കൺ പോളകൾ തൂങ്ങിനിൽക്കുന്ന അവസ്ഥയ്ക്ക് മാറ്റമുണ്ടാകുന്നു.