മണ്ടത്തരത്തിന് എന്തിന് സെക്കൻഡ്

ലാൽ സലാം

- ലാൽ

ഞാനും സിദ്ദീഖും ആദ്യമായി ഫാസിൽ സാറിന്റെ അസിസ്റ്റ ആയി ജോലി ആരംഭിക്കുന്നത് നോക്കെത്താ ദൂരത്ത് കണ്ണുംനട്ട്' എന്ന സിനിമയിലാണ്. ആദ്യമായി അതിരാവിലെ എഴുന്നേൽക്കുന്നതും ചൂടുവെള്ളത്തിൽ കുളിക്കുന്നതും ആ സിനിമയുടെ ഷൂട്ടിങ് സമയത്താണ്. ഹീറ്ററിൽ നിന്നു വരുന്ന ചൂടുവെള്ളത്തിന്റെ മണം ഇന്നും എന്റെ ഓർമയിൽ ഉണ്ട്. പത്മിനിയും നാദിയാ മൊയ്തുവും മോഹൻലാലുമെല്ലാം തകർത്തഭിനയിച്ച ആ ചിത്രത്തിന്റെ പേരെന്തെന്നു ചോദിച്ചാൽ ഇന്ന് കൊച്ചുകുട്ടികൾ പോലും സംശയമില്ലതെ പറയും നോക്കെത്താ ദൂരത്ത് കണ്ണുംനട്ട്'. എന്നാൽ, ആ സിനിമയുടെ ഷൂട്ടിങ് സമയത്ത് ഞങ്ങളെക്കൊണ്ട് ഏറ്റവും കൂടുതൽ പണിയെടുപ്പിച്ചിട്ടുള്ളത് ആ പേര് തന്നെയാണ്. ഷൂട്ടിങ് ലൊക്കേഷനിൽ തടിച്ചു കൂടുന്ന ആളുകൾ അസിസ്റ്റന്റുമാരായ ഞങ്ങളെ അടുത്തു കിട്ടുമ്പോൾ ചോദിക്കും:

“എന്താ ഈ പടത്തിന്റെ പേര്?

“നോക്കെത്താ ദൂരത്ത് കണ്ണും നട്ട്.

“ഏഹ്? എന്ത്? എങ്ങനെ?''

ഞങ്ങൾ വീണ്ടും പറയും,

“നോക്കെത്താദൂരത്ത് കണ്ണും നട്ട്.

അപ്പോഴും അവർക്കത് വ്യക്തമാകില്ല. ഇങ്ങനെ ചോദിക്കുന്നവരോടെല്ലാം മൂന്നും നാലും തവണ ഞങ്ങൾക്ക് ആ പേര് ആവർത്തിക്കേണ്ടി വരുമായിരുന്നു. എന്നിട്ടും ആ ലൊക്കേഷനിൽ നിൽക്കുന്ന പലരും തമ്മിൽ പറഞ്ഞ് ആ പേര് വേറെ രീതിയിൽ ആയിത്തീരും. ഓരോരുത്തരും പറയുന്നത് ഓരോരോ പേരുകൾ. ഇങ്ങനെ പലരും പലതരത്തിൽ പേരുകൾ പറയുന്നതിനിടയിൽ ഒരാൾ മറ്റൊരാളോടു പറഞ്ഞ ഒരു പേര് ഞങ്ങൾ കേട്ടു. വളരെ രസകരമായി തോന്നിയതു കൊണ്ട് ഞങ്ങൾ അയാളെ വിളിച്ചു ചോദിച്ചു:

“ചേട്ടാ, എന്താ ചേട്ടാ ഈ സിനിമയുടെ പേര്?

അയാൾ വിചിത്രമായ ആ പേര് ആവർത്തിച്ചു. ഞങ്ങൾ അത് ഫാസിൽ സാറിനോട് പോയി പറഞ്ഞു. ഫാസിൽ സാർ ചിരിച്ചു.