എന്റെ അവധിക്കാലം

നോവലിസ്റ്റും ബാലസാഹിത്യകാരനുമാണ് ലേഖകൻ. കേരള സാഹിത്യ അക്കാദമി അവാർഡ്, വയലാർ അവാർഡ് തുടങ്ങി നിരവധി പുരസ്കാരങ്ങൾ. പാലക്കാടും കോഴിക്കോടും ജില്ലാ കലക്ടർ ആയിരുന്നു.

- കെ.വി. മോഹൻകുമാർ

എന്റെ ബാല്യത്തിൽ വേനലവധിക്കാലം ഞാൻ ശരിക്കും ആസ്വദിച്ചത് എട്ടാമത്തെ വയസ്സിൽ ആലപ്പുഴപ്പട്ടണത്തിൽ നിന്ന് അമ്മയുടെ നാടായ ചേർത്തല തെക്ക് ഗ്രാമത്തിലേക്കു താമസം മാറിയതോടെ യാണ്. അച്ഛന്റെ മരണത്തെത്തുടർന്നാണ് ഞങ്ങൾ പട്ടണം വിട്ടുപോന്നത്. ചേർത്തല-തെക്ക് ഗ്രാമം ഗബ്രിയേൽ ഗാർഷ്യ മാർക്കേസിന്റെ 'ഏകാന്തതയുടെ നൂറു വർഷങ്ങളിലെ മാക്കോണ്ടോ പോലൊരു വിചിത്രദേശമായിരുന്നു. എവിടെ നോക്കിയാലും ഉയരത്തിൽ വെളുത്ത പഞ്ചാരമണൽക്കുന്നുകൾ. വെയിലേൽക്കുമ്പോൾ അതിലെ സിലിക്കോൺ തരികൾ വെട്ടിത്തിളങ്ങും. കുന്നുകളോടുചേർന്ന് വിശാലമായ നെൽപ്പാടങ്ങൾ. തെങ്ങിൻ പുരയിടങ്ങൾ. വയലുകൾക്കിടയിലൂടെ കടന്നു പോകുന്ന നടവരമ്പുകൾ. ചിറകൾ. വയൽവെള്ളത്തിലൂടെ മിന്തിമിന്തിപ്പോകുന്ന ശംഖിന്റെ ആകൃതിയിലുള്ള ഞവിണിക്കകൾ. നാരൻ ചെമ്മീനുകൾ, മാനത്തു കണ്ണികൾ. കുളക്കരകളിൽ വെയിൽ കായാനിരിക്കുന്ന ആമകൾ. നാനാതരം പക്ഷികൾ. കള്ളിയും കാരയും മുറ്റിവളർന്ന വിശാലമായ വെളിമ്പറമ്പുകൾ, പറങ്കിമാവുകൾ. ചെറുപുന്നകൾ.