HYBRID LUXURY

സ്റ്റൈലിലും ഫീച്ചേഴ്സിലും പരിഷ്കാരവുമായി ഒൻപതാംതലമുറ ടൊയോട്ട കാംറി

- നോബിൾ എം. മാത്യു

ഇന്ത്യൻ വിപണിയിലെ മിഡ്സ് ലക്ഷ്വറി സെഡാനുകളിൽ ഏറ്റവും സ്വീകാര്യതയുള്ള വാഹനമാണ് ടൊയോട്ട കാംറി. 1983ൽ ലോകവിപണിയിലെത്തിയ കാംറിയുടെ ആറാം തലമുറയാണ് ടൊയോട്ട ഇന്ത്യയിൽ അവതരിപ്പിച്ചത്, 2002ൽ. 17.95 ലക്ഷം രൂപയായിരുന്നു അന്ന് വില. ഡി സെഗ്മെന്റിൽ അന്നു തുടങ്ങിയ കുതിപ്പ് ഹൈബ്രിഡ് കരുത്തിൽ കാംറി ഇന്നും തുടരുകയാണ്. 2013 മുതലാണ് കാംറി ഇന്ത്യയിൽ നിർമിച്ചു തുടങ്ങിയത്. ആഡംബരവും സുരക്ഷയും ഫീച്ചേഴ്സും എല്ലാം ടോപ് ലെവലിൽ സമന്വയിപ്പിച്ചാണ് ഒൻപതാം തലമുറയെത്തിയിരിക്കുന്നത്. കൊച്ചിയിൽ നിന്നും വാഗമണ്ണിലേക്ക് കാംറിയുടെ ഹൈബ്രിഡ് കരുത്തിലൊന്നു പോയി വരാം.

ഡിസൈൻ

ഫ്യൂച്ചറിക് ഡിസൈൻ തീമിൽ, പരിഷ്കരിച്ച ഡിസൈനുമായാണ് 2025ൽ കാംറിയുടെ വരവ്. പുറംകാഴ്ചയിൽ കാംറി ഏറെ മാറി. ഇത് കാംറിയോ എന്നു ചോദിച്ചുപോകുന്ന അപ്പീൽ. നീളമേറിയ ബോണറ്റും ഒതുക്കമുള്ള ചേലുള്ള ഹെഡ്ലാംപും വലിയ ബംപറും അതിലെ എലമെന്റുകളും എയർഡാമുമെല്ലാം വെറൈറ്റി ലുക്ക് നൽകുന്നു. എൽഇഡി ഹെഡ്ലാംപും ടെയിൽ ലാംപും പുതിയ താണ്. ഗ്രില്ലും ബംപറും റീ ഡിസൈൻ ചെയ്തു. 18 ഇഞ്ച് അലോയ് വീൽ പുതിയത്. മുൻ മോഡലുമായി വലുപ്പത്തിൽ കാര്യമായ മാറ്റമൊന്നുമില്ല. നീളം 45 എംഎം മാത്രം കൂടി. മുൻ പിൻ ഭാഗത്തെ പരിഷ്കാരങ്ങൾ മൂലമാണിത്. മുൻവശത്തിന് എലഗന്റ് ലുക്കാണെങ്കിൽ പിന്നിലേക്കു വരുമ്പോൾ അതിനൊപ്പം സ്പോർട്ടിനെസ്സും ബോൾഡ് ക്യാരക്ടറും കൂട്ടിച്ചേർത്തിട്ടുണ്ട്.