ബ്രെസ്സ പവർഫുള്ളാണ്

യുട്യൂബിൽ 84.8 ലക്ഷം സബ്സ്ക്രൈബേഴ്സുള്ള ഫുഡ് വ്ലോഗർ ഫിറോസ് ചുട്ടിപ്പാറ തന്റെ യാത്രയും ജീവിതവും പങ്കുവയ്ക്കുന്നു

- സിജിത് പയ്യന്നൂർ

വാഹനങ്ങളൊന്നുമില്ലാതിരുന്ന പാലക്കാട്ടെ ചുട്ടിപ്പാറയെന്ന ഗ്രാമത്തിലായിരുന്നു എന്റെ കുട്ടിക്കാലം. ബസിൽ കയറണമെങ്കിൽ പോലും 2 കിലോമീറ്റർ നടന്ന് പാറ സ്റ്റോപ്പിലെത്തണം. പാലക്കാടിന്റെ സൗന്ദര്യം ആവാഹിച്ച അനേകം ഗ്രാമങ്ങളിലൊന്നായിരുന്നു ചുട്ടിപ്പാറയും. ഫുഡ് ബ്ലോഗ് തുടങ്ങിയപ്പോഴും അതിന്റെ മനോഹാരിത ജനങ്ങളിലെത്തിക്കാനായിരുന്നു എന്റെ ശ്രമം. ജീവിതത്തിന്റെ ഒരു കാലഘട്ടംവരെ വാഹനങ്ങളോടും യാത്രകളോടും അമിതമായ ഭ്രമം മനസ്സിൽ കൊണ്ടു നടന്ന ഒരാളായിരുന്നില്ല ഞാൻ. ജീവിതത്തിലെ ബുദ്ധിമുട്ടുകളും പ്രയാസങ്ങളും അതിനു കാരണമായി. പക്ഷേ, ഇന്നു യാത്രകളെ ഞാൻ നന്നായി ആസ്വദിക്കുന്നുണ്ട്.

യാത്രയും ജീവിതവും

4 കിലോമീറ്റർ നടന്നായിരുന്നു അന്നു സ്കൂളിൽ പോയിരുന്നത്. എട്ടാം ക്ലാസിൽ വച്ചാണ് ആദ്യമായി അച്ഛൻ ഒരു സെക്കൻഡ് ഹാൻഡ് സൈക്കിൾ വാങ്ങിത്തരുന്നത്. ഹെർക്കുലീസിന്റെ ഒരു നീല സൈക്കിളായിരുന്നു അച്ഛൻ വാങ്ങിയത്. 600 രൂപയായിരുന്നു അതിന്റെ വില. സൈക്കിൾ എത്തിയതോടെ ഞാൻ സൈക്കിൾ മെക്കാനിക്കുമായി. സ്വന്തമായി പഞ്ചറൊട്ടിക്കാനും അൽപസ്വൽപം മെക്കാനിക്ക് പണിയുമെല്ലാം ഞാൻ പഠിച്ചു. വല്ലപ്പോഴും ബസിനു പോകണമെന്നു പറഞ്ഞു വീട്ടിൽ നിന്നു വാങ്ങുന്ന പൈസയ്ക്കു കടലമിഠായി വാങ്ങിക്കഴിക്കും. അതോടെ സ്കൂളിലേക്കു നടന്നുപോകുന്നത് ഒരു ശീലമായി. അന്ന് 10 പൈസയ്ക്ക് ഒരു ചിരട്ട ഉപ്പ് കിട്ടും. പണത്തിന്റെ വില ശരിക്കും അറിഞ്ഞ കാലഘട്ടമായിരുന്നു അത്. യാത്രകൾ ചെലവുള്ള പരിപാടിയായിരുന്നതിനാൽ ഒരുപാട് യാത്ര ചെയ്യുന്ന ഒരാളായിരുന്നില്ല ഞാൻ.

ചുട്ടിപ്പാറയിലെ ആദ്യത്തെ ടൂ വീലർ