When Music Heals...

ക്ലാസ്മേറ്റ്സിനു ശേഷം പാട്ടു നിർത്തിയ അലക്സ് പോൾ ആലപ്പുഴ ജിംഖാന വരെ എവിടെയായിരുന്നു ?

- രൂപാ ദയാബ്ജി

വർഷങ്ങൾക്കു മുൻപാണ്. ക്ലാസ്മേറ്റ്സ് സിനിമ തിയറ്ററുകൾ നിറഞ്ഞോടു കാറ്റാടിത്തണലും കാത്തിരുന്ന പെണ്ണും എല്ലാ ഖൽബിലും വെണ്ണിലാവു നിറച്ച ഒരു പകലിലാണു സംഗീത സംവിധായകൻ അലക്സ് പോൾ ആ തീരുമാനം പ്രഖ്യാപിച്ചത്, "ഞാൻ സംവിധാനം ചെയ്യുന്ന സിനിമയിലേ ഇനി സംഗീതം ചെയ്യൂ...'

വർഷങ്ങൾക്കിപ്പുറമാണ് അടുത്ത സംഭവം. ആലപ്പുഴ ജിംഖാന തിയറ്ററുകൾ നിറഞ്ഞാടുന്നു. നായകനായ നസ്ലൻ അച്ഛനോടു പറയുന്ന ഡയലോഗിനു തിയറ്ററിൽ കയ്യടി, "അപ്പനിങ്ങനെ പണിയില്ലാതെ വീട്ടിലിരിക്കേണ്ട ആളല്ല...' അപ്പനായി അഭിനയിച്ച സംഗീതസംവിധായകൻ അലക്സ് പോളിന്റെ ഹിറ്റുപാട്ടുകൾക്കുള്ള കയ്യടിയായിരുന്നു അത്.

ഈ രണ്ടു സിനിമകൾക്കുമിടയിൽ അലക്സ് പോളിന് എന്താണു സംഭവിച്ചത് ? ചോദ്യം കേട്ടപാടേ ഒന്നു ചിരിച്ചു മറുപടിയെത്തി, “സിനിമാ സംവിധാനമാണ് അന്നും ഇന്നും സ്വപ്നം. പാട്ടിന്റെ വഴിയേ പോയപ്പോഴും ആ മോഹം മനസ്സിൽ കിടന്നു. ഇപ്പോൾ ദൈവം പറഞ്ഞു, സമയമായി...''

സംവിധാനം ചെയ്യുന്ന സിനിമയുടെ വിശേഷങ്ങൾ പറയു...

പാൻ ഇന്ത്യൻ മൂവീസ് എന്ന നിർമാണ കമ്പനിക്കു കീഴിൽ ഞാനും തെങ്കാശി സ്വദേശിയായ പാർട്ണർ ബിനുവും ചേർന്നു നിർമിക്കുന്നത് 14 സിനിമകളാണ്. അതിൽ ആദ്യത്തേത്, എവേക് സെപ്റ്റംബറിൽ തുടങ്ങും. ഹൊറർ ജോണറിലുള്ള സിനിമയാണത്.

ഞാൻ സംവിധാനം ചെയ്യുന്ന ആ ദ്യ സിനിമയുടെ കഥയും തിരക്കഥയും എഴുതുന്നതു മകൾ അശ്വതിയാണ്. ജെയ്ൻ യൂണിവേഴ്സിറ്റി കാക്കനാട് ക്യാംപസിൽ അസിസ്റ്റന്റ് പ്രഫസറായ അശ്വതി ജോലി രാജി വച്ചാണു സിനിമയിലേക്കു വരുന്നത്. എവേക്കിനു ശേഷം വരുന്ന കോമഡി ചിത്രത്തിന്റെ കഥയും മകളുടെ തന്നെ.

സംവിധാനമോഹം മനസ്സിലെത്തിയത് എങ്ങനെ ?

മൂന്നാം ക്ലാസ്സിൽ പഠിക്കുന്ന സമയം. ഒരു ദിവസം സ്കൂൾ വിട്ടു വന്നപ്പോൾ വീട്ടിൽ വലിയ ആൾക്കൂട്ടം. അവിടേക്കു ചെല്ലുന്നവരെ പൊലീസുകാർ അടിച്ചോടിക്കുന്നു. എന്നെയും ഓടിച്ചുവിട്ടു. വീട്ടുകാർ തിരക്കി വന്നപ്പോൾ ഞാൻ റോഡിൽ നിന്നു കരയുകയാണ്. പക്ഷേ, അകത്തു കയറിയപാടേ കരച്ചിൽ ചിരിയായി.