பரதம் எனது மூச்சுக் காற்று!

மூன்றாம் தலைமுறை பரதநாட்டியக் கலைஞர் மற்றும் பரதம் கற்பிக்கும் ஆசிரியராக விளங்குபவரும்; புகழ்பெற்ற நடனக் கலைஞர் பத்மஸ்ரீ சித்ரா விஸ்வேஸ்வரனிடம் நடனத்தில் மேற் பயிற்சியைப் பெற்றவரும்; உலகம் முழுவதும் பயணித்து நிகழ்வுகளை நடத்தியவரும்; நிருத்திய நிபுணா போன்ற பல விருதுகளை வாங்கியவரும்; மும்பை கலாசதன் நுண்கலைக் கழக குடும்பத்தின் முக்கிய அங்கத்தினருமாகிய பரத நாட்டியக் கலைஞர் திருமதி நந்தினி கணேசன், பெண்மணிக்காக அளித்த சுவையான பேட்டி இதோ:

- -ஆர். மீனலதா, மும்பை

தங்களைப் பற்றி கூறுங்கள்.....

மும்பை வாசியாகிய நான் குரு கலாசதன் மணியின் பேத்தி. எனது பெற்றோர்கணேசன் மற்றும் சாரதா ஆவார்கள். பரதக் கலையை மூச்சாகக் கொண்ட குடும்பத்தின் மூன்றாம் தலைமுறைக் கலைஞராகவும், நடனத்தைக் கற்றுக் கொடுக்கும் ஆசிரியராகவும் செயல்பட்டு வருகிறேன். தாத்தா மணி தான் எனது குரு.

திருச்சூரை சேர்ந்த எனது தாத்தா தெற்கு மும்பையில் உள்ள இன்டர்நேஷனல் புக் ஹவுசில் பணிபுரிய வந்த போது, கலை எண்ணம் கொண்டவர்களுடன் சேர்ந்து சேத்தனா எனும் கலாச்சார மையத்தை ஆரம்பித்தார்.

உங்கள் தாத்தாவுக்கு பரதநாட்டியத்தில் ஈடுபாடு ஏற்பட்டது எவ்வாறு....?

தாத்தா ஆரம்பித்த சேத்தனா கலாச்சார மையத்துக்கு நல்ல வரவேற்பு இருந்தது. மும்பைக்கு வரும் மூத்த நடனக் கலைஞர்களும், இசைக் கலைஞர்களும் இங்கு வந்து நிகழ்ச்சிகளை நடத்துவது வழக்கம். பரத நாட்டியக் கலையால் ஈர்க்கப்பட்ட தாத்தா, தயக்கங்களை ஒதுக்கி விட்டு, தன்னுடைய 40 - ஆவது வயதில் மாதுங்காவிலுள்ள ராஜ ராஜேஸ்வரி பரத நாட்டிய கலா மந்திரின் கலைமாமணி குப்பையா பிள்ளையின் மகளான குரு கருணாம்பாள் கோவிந்தராஜ பிள்ளையிடம் நடனம் கற்க ஆரம்பித்தார். இவரிடம் எனது தாத்தா நடனம் கற்க வந்த போது, “மணி ஒரு கலைக் குடும்பத்தை உருவாக்குவார் என்று நாங்கள் ஒருபோதும் கற்பனை செய்திருக்கவில்லை. வகுப்பில் கற்கும் மற்ற சிறுமிகளை விட, அதிக நளினத்துடன் மணி ஆடுகிறார்" என்று அவருடைய குரு கூறுவாராம்.

ராஜ ராஜேஸ்வரி பரத நாட்டிய கலா மந்திரில் தனது பயிற்சியை முடித்த பிறகு, மும்பையின் பல்வேறு புறநகர்ப் பகுதிகளுக்கும் பயணம் செய்து மாணவர்களுக்கு தனித்தனியாக கற்பிக்கத் தொடங்கினார். பின்னர் சயானில் உள்ள தன்னுடைய வீட்டில் 1954 - ஆம் ஆண்டு கலாசதன் நுண்கலை கழகத்தை நிறுவினார். அவருக்கு இரண்டு மகன்களும், நான்கு மகள்களும் இருந்தனர். அனைவருமே பரத நாட்டியம், கர்நாடக சங்கீதம் கற்பித்தல், மிருதங்கம் மற்றும் வயலின் போன்ற வாத்தியக் கருவிகளை வாசித்தல் போன்றவைகளில் ஈடுபட்டிருந்தனர். குரு மறைந்து அநேக ஆண்டுகள் ஆனபிறகும், அவர் ஆரம்பித்த பாரம்பரியத்தை, கலாசதன் அமைப்பு தொடர்ந்து நடத்தி வருகிறது.