குரு, பயிற்சி, முயற்சி மூன்றும் இசைக்கு முக்கியம்!

கர்நாடக சங்கீதத்தின் பல்வேறு அருமையான வகைகளை தன்னம்பிக்கையுடன் சலிப்பின்றி உற்சாகத்துடன் பாடுபவரும்; இசை மும்மூர்த்திகளில், குறிப்பாக முத்துஸ்வாமி தீட்சிதர்கிருதிகளின் மீது பேரார்வம் கொண்டவரும்; கர்நாடக இசை மேதை டி.எம்.கிருஷ்ணாவின் மூத்த சிஷ்யரும் ; மல்டி நேஷனல் கம்பெனியில் பணிபுரிந்து வருபவரும்; குருகுஹாம்ரதம்' எனும் அறக் கட்டளையின் நிறுவனருமான கர்நாடக இசைக் கலைஞர் ஜி.ரவிகிரண், 'பெண்மணிக்காக' மனம் உவந்து அளித்த பேட்டி:

- ஜி.ரவிகிரண்

தங்களைப் பற்றிக் கூறுங்களேன்...? 

பெங்களூரு BEML நிறுவனத்தில் தகப்பனார் பணிபுரிந்து வந்த காரணத்தால், எனது வளர்ச்சியெல்லாம் அங்கேதான் ஏற்பட்டது. பெற்றோர்கள் இருவரும் சங்கீதத்தை மிகவும் நேசிப்பவர்களாக இருந்ததால், கர்நாடக சங்கீதத்துடன் மற்ற வகை இசைகளிலும் ஈடுபாடு உருவானது.

வீட்டில் தாயார் வீணை வாசிப்பதைக் கேட்டு கர்நாடக இசையும், தகப்பனாரிடமிருந்து பழைய தமிழ் மற்றும் இந்தி திரைப்பாடல்களின் தொகுப்புகளை கேட்டு மெல்லிசையும் என்னுள் புகுந்தது. கர்நாடக சங்கீதம் கற்கத்தக்க சூழ்நிலை இயற்கையாகவே அமைந்தது இறையருளே எனலாம். எனது மனைவி அர்ச்சனா சிறந்த பரதநாட்டிய குரு ஆவார். குடும்பத்தின் பெரிய தூணாக விளங்கும் இவர் தான் எங்கள் பலமெனக் கூறலாம். எங்களின் இரு குழந்தைகளும் இசை மற்றும் ரிதம் ஆகியவைகளில் ஈடுபாடு கொண்டவர்கள்.