புவிசார் அதிகார போட்டிக்கு மத்தியில்

பிரதமர் ஹரிணி சீனா விஜயம்

- 

ஷங்காய் ஒத்துழைப்பு அமைப்பின் உச்சி மாநாட்டில் கலந்துகொள்வதற்காக பிரதமர் ஹரிணி அமரசூரிய எதிர்வரும் 29 ஆம் வெள்ளிக்கிழமை சீனாவுக்கு விஜயம் செய்ய உத்தேசித்துள்ளார். மூன்று நாட்கள் சீனாவில் தங்கியிருக்கும் அவர், சீன ஜனாதிபதி ஜி ஜின்பிங் உள்ளிட்ட அந்நாட்டுத் தலைவர்களுடன் இருதரப்புப் பேச்சுவார்த்தைகளில் ஈடுபட உள்ளார். இதேவேளை ஷங்காய் ஒத்துழைப்பு உச்சி மாநாட்டில் கலந்துகொள்ள உள்ள இந்தியப் பிரதமர் நரேந்திர மோடி உள்ளிட்ட உறுப்பு நாடுகளின் தலைவர்களையும் பிரதமர் ஹரிணி சந்தித்துப் பரஸ்பரப் பேச்சுவார்த்தைகளை முன்னெடுக்க உள்ளார்.

ஷங்காய் ஒத்துழைப்பு அமைப்பின் 2025 உச்சிமாநாடு எதிர்வரும் 31 ஆம் திகதி ஞாயிற்றுக்கிழமை இடம்பெறவுள்ளது. சீனாவின் தியான்ஜின் நகரில் நடைபெற உள்ள இந்த உச்சி மாநாட்டில் உறுப்பு நாடுகளின் தலைவர்கள் பங்கேற்க உள்ளனர். ஜனாதிபதி அநுரகுமார திசாநாயக்க அமெரிக்க விஜயத்திற்கு முன்னர் ஷங்காய் ஒத்துழைப்பு உச்சிமாநாட்டில் கலந்துகொள்ள திட்டமிட்டிருந்தார். எனினும் தற்போது அமெரிக்க விஜயத்தை நிறைவுசெய்து, அங்கிருந்து ஜப்பான் செல்ல தீர்மானிக்கப்பட்டுள்ளது. இவ்வாறானதொரு நிலையிலேயே பிரதமர் ஹரிணி அமரசூரிய சீனாவுக்குச் செல்கின்றார்.

ஷங்காய் ஒத்துழைப்பு அமைப்பின் உச்சி மாநாடு, ஆசியாவின் புவிசார் அரசியல் ஒழுங்கு, பெரும் மாற்றங்களுக்கு உள்ளாகி வருவதை மீண்டும் ஒருமுறை உறுதிசெய்துள்ளது. ஒருபுறம் ரஷ்யா, சீனாவுக்கிடையிலான உறவு வலுப்பெற்று வரும் நிலையில், மறுபுறம் இந்தியாவுக்கும் அமெரிக்காவுக்கும் இடையிலான உறவில் முன்னெப்போதும் இல்லாத அளவில் விரிசல் ஏற்பட்டுள்ளது. இந்தச் சிக்கலான அதிகாரப் போட்டிக்கு மத்தியில், இலங்கை போன்ற நாடுகள் தங்களது வெளியுறவுக் கொள்கையை மிகவும் அவதானமாக வகுக்க வேண்டிய கட்டாயத்தில் உள்ளன.