Vast array of talent on display at Anglesey Young Farmers Rally

AE 'na nifer o arwyddion bod tymor yr haf wedi'n cyrraedd. Un o'r rheini i mi yw pam ddaw'r gwahoddiad gan Glwb Ffermwyr Ifanc Ynys Môn i fynychu eu rali flynyddol, ac eleni - fel yr arfer - wnaeth safon ac amrywiaeth y cystadlu ddim ein siomi!

- 

O goginio i grefft, a ffotograffiaeth i ddawnsio, mae yna gyfle i bawb o bob clwb i arddangos eu sgiliau ac i gystadlu mewn amgylchedd cefnogol a hwylus. Llongyfarchiadau, wrth gwrs, i glwb Penmynydd am ddod i'r brig eleni, ond hefyd i bawb fu'n cystadlu, a diolch i'r trefnwyr am eu holl waith drwy gydol y flwyddyn yn cynnig gymaint o gyfleoedd i'n pobl ifanc ym Môn.

Aiff rhai ohonynt rŵan ymlaen i'r Sioe Frenhinol i brofi eu gallu yn erbyn clybiau ar draws Gymru - pob lwc iddyn nhw!

Mae sicrhau cyfleoedd i bobl ifanc gymdeithasu yn eu cymunedau ar Ynys Môn yn hanfodol, ond mae hefyd yn bwysig sicrhau bod yr amodau economaidd yn ffafriol iddyn nhw allu cynnal busnesau ffyniannus a gosod eu gwreiddiau eu hunain yma - mae hynny'n berthnasol iawn ym myd amaethyddiaeth. Doeddwn i erioed o'r farn y dylai'r Deyrnas Unedig adael yr Undeb Ewropeaidd, ac ym mhlith y nifer fawr o resymau dros gredu hynny oedd y difrod economaidd fyddai'n dilyn.

Yn anffodus, mae'r pryderon am yr effaith fyddai'r penderfyniad yn ei gael ar ein heconomi bellach wedi eu gwireddu - mae 'Brexit' wedi costio bron i £4 biliwn i Gymru yn barod. Rhan fawr o hynny oedd gadael yr Undeb Ewropeaidd heb unrhyw gytundeb, a olygodd yr angen - dros nos - am ganolfannau i gynnal gwiriadau ar gynnyrch oedd yn cyrraedd ein porthladdoedd. Yng Nghaergybi, dechreuodd y gwaith ar adeiladu canolfan sydd wedi costio miliynau i drethdalwyr, a rŵan - gyda'r cyhoeddiad diweddar am gytundeb masnach rhwng y D.U. a'r U.E. - mae'n bosib na fydd pwrpas o gwbl i'r ganolfan.