மக்களின் செல்வாக்கை திமுக இழந்துவிட்டது

மக்களின் செல்வாக்கை திமுக இழந்துவிட்டதாக தமிழக சட்டப்பேரவை எதிர்க்கட்சித் தலைவரும், அதிமுக பொதுச் செயலருமான எடப்பாடி கே. பழனிசாமி தெரிவித்தார்.

- எடப்பாடி கே. பழனிசாமி

காரைக்குடி/திருப்பத்தூர்/சிவகங்கை, ஜூலை 29:

மக்களைக் காப்போம், தமிழகத்தை மீட்போம்' எழுச்சிப் பயணத்தையொட்டி, பல்வேறு மாவட்டங்களில் மக்களைச் சந்தித்து பேசி வரும் எடப்பாடி கே. பழனிசாமி, சிவகங்கை மாவட்டம், காரைக்குடிக்கு செவ்வாய்க்கிழமை மாலை வந்தார்.

அவருக்கு சிவகங்கை மாவட்ட அதிமுக செயலரும், சட்டப்பேரவை உறுப்பினருமான பி.ஆர். செந்தில்நாதன் தலைமையில் அதிமுகவினர் வரவேற்பளித்தனர்.

கழனிவாசல், செக்காலைச்சாலை, பெரியார் சிலை வழியாக காரைக்குடி ஐந்துவிளக்குப் பகுதி எம்.ஜி. ஆர். சிலை உள்ள பகுதியில் பிரசார வாகனத்திலிருந்து எடப்பாடி கே. பழனிசாமி பேசியதாவது:

காரைக்குடிக்கு ஒரு வரலாறு உண்டு. பல்வேறு கல்வி நிறுவனங்களை நிறுவி இந்தப் பகுதி மக்களுக்கு கல்வியை கொடுத்ததோடு மட்டுமல்லாமல், ஆயிரக்கணக்கான நிலங்களையும் வழங்கிய வள்ளல் அழகப்பர் வாழ்ந்த பூமி இது. அழகப்பா பல்கலைக்கழகம், மத்திய மின் வேதியியல் ஆய்வகம் போன்றவை உள்ளதும் செட்டிநாடு என்று பெருமையோடும் அழைக்கப்படும் பகுதிதான் காரைக்குடி. இந்தப் பகுதியில் வணிகப் பெருமக்கள் நிறைந்திருக்கிறார்கள். அழகான கட்டடக் கலையுடன்கூடிய வீடுகள் நிறைந்த பகுதியாகும்.

காரைக்குடி தற்போது மாநகராட்சியாக உள்ளது. இங்குள்ள மேயர் லஞ்சம் பெற்றுக்கொண்டு இந்த மாநகராட்சிக்குச் சொந்தமான இடங்களை வணிகப் பயன்பாட்டுக் காக தனியாருக்கு குறைந்த வாடகையில் குத்தகைக்கு விட்டார். மேலும், மாநகராட்சியில் தீர்மான விவாதம் இல்லாமலேயே சுமார் ரூ. 30 கோடிக்கு ஒப்பந்தப்பணியை விட்டிருக்கிறார்.

எனவே, வருகிற பேரவைத் தேர்தலுக்குப் பிறகு அதிமுக ஆட்சி அமைந்தவுடன் இந்த விவகாரத்தையும், மக்களாகிய நீங்கள் வைக்கும் கோரிக்கையையும் விசாரித்து சம்பந்தப்பட்டவர்கள் மீது நடவடிக்கை எடுத்து உரிய தண்டனை பெற்றுத் தரப்படும்.