மக்களவைக்கு இதுவரை 18 முஸ்லிம் பெண்களே தேர்வு

சுதந்திர இந்தியாவில் இதுவரை 18 முஸ்லிம் பெண்களே மக்களவை எம்.பி.க்களாக இருந்துள்ளனர்; இவர்களில் 13 பேர் அரசியல் குடும்பங்களைச் சேர்ந்தவர்கள் என்று புதிய புத்தகம் ஒன்றில் தெரிவிக்கப்பட்டுள்ளது.

- 

புது தில்லி, ஜூலை 20:

ரஷீத் கித்வாய், அம்பர் குமார் கோஷ் ஆகிய இருவர் எழுதியுள்ள 'மிஸ்ஸிங்ஃப்ரம் தி ஹௌஸ்-முஸ்லிம் உமன் இன் தி லோக் சபா' எனும் இப்புத்தகம் அடுத்த மாதம் வெளியிடப்படவுள்ளது. இப்புத்தகத்துக்கு காங்கிரஸ் எம்.பி. சசி தரூர் முன்னுரை எழுதியுள்ளார்.

ரஷீத் கித்வாய் கூறுகையில், 'நாட்டில் 1951-52இல் முதல் நாடாளுமன்றத் தேர்தல் நடந்ததில் இருந்து இதுவரை தேர்வான மொத்த முஸ்லிம் பெண் எம்.பி.க்கள் 20 பேர். இவர்களில் சுபாஷிணி அலி, அஃப்ரின் அலி ஆகியோர் தாங்கள் இஸ்லாத்தை பின்பற்றவில்லை என்று வெளிப்படையாக தெரிவித்துவிட்டனர். எனவே, எம்.பி.க்களாக பதவி வகித்த 18 முஸ்லிம் பெண்களின் சுய விவரங்களை ஆவணப்படுத்தியுள்ளோம்.

146 கோடி மக்கள்தொகை கொண்ட இந்தியாவில் முஸ்லிம் பெண்களின் எண்ணிக்கை 7.1 சதவீதமாக கருதப்படுகிறது.