கண்டதேவி கோயில் விவகாரம்: அரசு எழுத்துபூர்வமாக பதிலளிக்க உத்தரவு

கண்டதேவி கோயில் திருவிழாவில் யாருக்கும் முதல் மரியாதை அளிக்கப்படவில்லை என்பதை தமிழக அரசு எழுத்துபூர்வமாக அறிக்கை தாக்கல் செய்ய சென்னை உயர்நீதிமன்ற மதுரை அமர்வு செவ்வாய்க்கிழமை உத்தரவிட்டது.

- 

மதுரை, ஜூன் 24:

சிவகங்கை மாவட்டம், கண்ட தேவியைச் சேர்ந்த கேசவமணி சென்னை உயர்நீதிமன்ற மதுரை அமர்வில் தாக்கல் செய்த பொது நல மனு: சிவகங்கை மாவட்டம், கண்ட தேவியில் ஸ்ரீசொர்ணமூர்த்தீஸ்வரர் கோயில் அமைந்துள்ளது. சிவகங்கை தேவஸ்தானத்துக்கு பாத்தியப்பட்ட இந்தக் கோயிலில், யாருக்கும் முதல் மரியாதை வழங்கக் கூடாது எனவும், அனைத்து சமூக மக்களையும் இணைத்து அவர்களது பங்களிப்புடன் திருவிழா நடத்தப்பட வேண்டும் எனவும் கடந்த 2014-ஆம் ஆண்டு உயர்நீதிமன்றம் உத்தரவிட்டது.

இந்த நிலையில், கடந்தாண்டு இந்தக் கோயில் தேரோட்டமும், திருவிழாவும் நடைபெற்றது. அப்போது, அனைத்து சமூக மக்களும் தேரின் வடத்தைப் பிடித்து இழுப்பதற்காக அனுமதிச் சீட்டுகள் வழங்கப்பட்டன.