ஈரானுக்கு உதவத் தயார்: ரஷியா

இஸ்ரேலுடனான மோதலில் ஈரானுக்கு உதவத் தயாராக இருப்பதாக ரஷியா தெரிவித்தது.

- 

மாஸ்கோ, ஜூன் 23:

ரஷியாவில் அந்த நாட்டு அதிபர் விளாதிமீர் புதினை, ஈரான் வெளியுறவு அமைச்சர் அப்பாஸ் அராக்சி திங்கள்கிழமை சந்தித்துப் பேசிய நிலையில், ஈரான் மக்களுக்கு உதவ முயற்சிகள் மேற்கொள்ளப்பட்டு வருவதாக ரஷியா கூறியது.

ஈரானின் அணுசக்தி, ஏவுகணைத் திட்டங்களால் தமக்கு அச்சுறுத்தல் இருப்பதாகக் கருதி, அந்நாடு மீது இஸ்ரேல் தாக்குதல் நடத்தியதைத் தொடர்ந்து, இரு நாடுகளுக்கு இடையிலான மோதல் தீவிரமடைந்துள்ளது.

இந்த மோதலில் இஸ்ரேலுக்கு அமெரிக்க அதிபர் டிரம்ப் ஆதரவு அளித்துவரும் நிலையில், ஈரானின் ஃபோர்டோ, நடான்ஸ் மற்றும் இஸ்ஃபஹான் பகுதிகளில் உள்ள மூன்று அணுசக்தி மையங்கள் மீது அமெரிக்க போர் விமானங்கள் ஞாயிற்றுக்கிழமை அதிகாலை குண்டுகள் மற்றும் ஏவுகணைகள் மூலம் தாக்குதல் நடத்தின.