மராத்தியர்களுக்கு எதிரான போரில் தோல்வியுற்ற ஔரங்கசீப்

'உலகின் பேரரசர் என்று தன்னைத்தானே அழைத்துக் கொண்டு, மராத்தியர்களுக்கு எதிராக வாழ்நாள் முழுவதும் போரிட்ட முகலாய மன்னர் ஔரங்கசீப், இறுதியில் தோற்கடிக்கப்பட்ட மனிதராக இறந்து மகாராஷ்டிரத்திலேயே அடக்கம் செய்யப்பட்டார்' என்று மத்திய உள்துறை அமைச்சர் அமித் ஷா சனிக்கிழமை தெரிவித்தார்.

- 

ராய்கட், ஏப். 12:

மராட்டிய மன்னர் சத்ரபதி சிவாஜியின் 345-ஆவது நினைவு நாளையொட்டி, மகாராஷ்டிர மாநிலத்தில் உள்ள புகழ்பெற்ற ராய்கட் கோட்டையில் அமைந்த அவரது நினைவிடத்தில் அமைச்சர் அமித் ஷா சனிக்கிழமை அஞ்சலி செலுத்தினார்.

தொடர்ந்து, அங்கு நடைபெற்ற கூட்டத்தில் அமைச்சர் அமித் ஷா பேசியதாவது: சுதந்திரத்தின் நூற்றாண்டு விழாவைக் கொண்டாடும் வேளையில் ஒரு வல்லரசு நாடாக மாறுவதற்கான இந்தியாவின் பயணத்தில் சத்ரபதி சிவாஜியின் 'சுயதர்மம்' மற்றும் 'சுயராஜ்யம்' போன்ற கொள்கைகள் உத்வேகம் அளிக்கின்றன. பிரதமர் நரேந்திர மோடி தலைமையிலான மத்திய பாஜக அரசும் சிவாஜி மகாராஜாவின் கொள்கைகளின் அடிப்படையிலேயே செயல்படுகிறது.