மாநிலத்தில் சுயாட்சி : ஒரு பார்வை

மக்களின் தேவைகள், உரிமைகள், கல்வி, பொருளாதாரம், வரலாறு, கலாசாரம், மொழி உள்ளிட்டவற்றில் மக்களுக்கு நெருக்கமாக இருந்து அறிந்து வைத்திருப்பது மாநில அரசுகள்தான். ஆனால், திட்டங்கள் வகுப்பது, சட்டங்கள் இயற்றுவதில் மத்திய அரசு அதிகாரம் செலுத்துவதே மாநில உரிமைகளுக்கான குரலாக வெளிப்படுகிறது.

- முனைவர் வைகைச்செல்வன்

இந்தியாவில் மாநிலங்கள் அதிகபட்ச தன்னாட்சி உரிமை பெற உரிய நடவடிக்கைகளைப் பரிந்துரைக்கவும், மத்திய மாநில அரசுகள் இடையிலான உறவுகள் குறித்து ஆராய்ந்து பரிந்துரை அளிக்கவும் மூன்று பேர் கொண்ட உயர்நிலைக் குழுவை அமைத்துள்ளது தமிழ்நாடு அரசு.

தமிழ்நாடு சட்டப்பேரவையின் நிதிநிலை அறிக்கை தாக்கலைத் தொடர்ந்து, துறை சார்ந்த மானியக் கோரிக்கைகள் குறித்து விவாதம் நடைபெறும் இந்த வேளையில், 110 விதியின் கீழ் தமிழ்நாடு முதலமைச்சர் மு.க.ஸ்டாலின் ஓர் அறிவிப்பை வெளியிட்டார்.

அந்த அறிவிப்பில், மாநில அரசின் நியாயமான உரிமைகளை மத்திய அரசு பறித்து வருவதாகவும், மத்திய அரசிடம் அதிகாரங்கள் குவிந்து வருவதையும் குறிப்பிட்டார். மாநில சுயாட்சி, மாநிலங்கள் அதிகாரம் குறித்துப் பட்டியலிட்டார்.

மத்தியில் 18 ஆண்டுகாலம் ஆட்சி அதிகாரத்தில் பங்கெடுத்து அதிகாரத்தைச் சுவைத்தது திமுக என்பது கடந்தகால வரலாறு. அப்போதெல்லாம் இந்தப் பிரச்னைகளை எழுப்பாது, தேர்தல் நெருங்கிவிட்ட வேளையில் உரிமைகளைப் பேசுவதும், மாநில அதிகாரங்கள் குறித்துப் பகிர்வதும் திமுகவின் வாக்குவங்கி அரசியலை நோக்கியதான நகர்வாகவே பார்க்கப்படுகிறது.

மறைந்த பிரதமர் அடல் பிகாரி வாஜ்பாய் அமைச்சரவையிலும், அதைத் தொடர்ந்து முன்னாள் பிரதமர் மன்மோகன் சிங் அமைச்சரவையிலும், மிக முக்கியமான துறைகள் எங்களுக்கு வேண்டும் என்று கேட்டுப் பெற முடிந்த திமுகவால், கச்சத்தீவை மீட்பதற்கோ, ஈழத் தமிழர் நலன் குறித்தோ, இரு மொழிக் கொள்கை குறித்தான அரசியல் சட்டத்தில் நிலையான இடத்தைத் தருவதற்கோ, நதிநீர் உரிமைகள் குறித்தோ அப்போது எதுவும் பேசாமல், 'தும்பை விட்டு வாலைப் பிடிக்கிற' கதையாக திடீரென்று ஞானோதயம் வந்துவிட்டதைப் போல மாநில உரிமைகளைப் பற்றி இப்போது பேசுகிறது திமுக. அதிகாரத்தில் இருந்தபோது இந்தப் பிரச்னையை எழுப்பவில்லை என்பதற்கு இதுபோன்ற பிரச்னைகள் அப்போது எழவில்லை என்று மிக லாகவமாகத் தப்பிக்க முயல்கிறார்கள்.

நீட் தேர்விலிருந்து விலக்கு அளிக்க வேண்டும் என்றும், அந்தத் தேர்வில் இருந்து விலக்கு பெறுவதற்கான ரகசியம் எங்களுக்குத் தெரியும் என்றும், 2021 சட்டப்பேரவைத் தேர்தலின்போது இப்போதைய துணை முதலமைச்சர் உதயநிதி பரப்புரை மேற்கொண்டார். ஆனால், அதன் ரகசியத்தை இன்றுவரை அவர் சொல்லவில்லை. நீட் தேர்வை ரத்து செய்வதற்கான மேல் நடவடிக்கை எடுக்கவில்லை.