ஆபத்து கால மீனவ நண்பன் 'நவமித்ரா' செயலி!

புதுவை மாநில மீனவர்களின் ஆபத்து கால நண்பனாக மத்திய அரசின் பிரதம மந்திரி மேம்பாட்டுத் திட்டத்தின் கீழ், படகுகளில் டிரான்ஸ்பாண்டன்ட் சாதனம் பொருத்தப்பட்டு 'நவமித்ரா' செயலி செயல்படுத்தப்படவுள்ளதை மீனவர் சமுதாயம் வரவேற்றுள்ளது.

- வ.ஜெயபாண்டி

புதுச்சேரி, ஏப். 20:

புதுவை மாநிலம் புதுச்சேரி, காரைக்கால், மாஹே, ஏனாம் என 4 பிராந்தியங்களைக் கொண்டுள்ளது.

இந்த நான்கு பிராந்தியங்களுமே கடல் பகுதிகளைக் கொண்டவை. மாநிலத்தில் மொத்தம் 32 மீனவ கிராமங்கள் இருப்பதாகக் கூறப்படுகிறது. அவற்றில் புதுச்சேரியில் மட்டும் 17 கிராமங்கள் உள்ளன.

மாநில அளவில் மொத்தம் சுமார் 25 ஆயிரம் மீனவ குடும்பங்கள் உள்ளதாகக் கூறப்படுகிறது.

மாநிலத்தில் 467 விசைப்படகுகளும், 3,600 இயந்திரம் பொருத்திய பைபர் படகுகளும், சுமார் 1,500 கட்டுமரத்தினாலான பாரம்பரிய வல்லம் போன்ற படகுகளும் உள்ளன.

மீனவர்கள் விசைப்படகுகளில் கடலுக்குள் சென்றால், குறைந்தது ஒரு வாரம் தங்கி மீன் பிடித்துத் திரும்புவர். பைபர் படகுகளில் செல்வோர் ஓரிரு நாள்களில் கரை திரும்புவர். நாட்டுப்படகுகளில் செல்வோர் தினமும் கரைக்குத் திரும்புவர்.

இந்த நிலையில், காரைக்கால் பகுதியில் சுமார் 260 விசைப்படகுகள் உள்ளன. அந்தப் படகுகளில் செல்வோர் சர்வதேச கடல் எல்லையைத் தாண்டியதாகவும், இலங்கை கடற்பகுதிக்குள் நுழைந்து மீன் பிடித்ததாகவும் அடிக்கடி கைதாகின்றனர்.

சில மாதங்களுக்கு முன்புகூட 10-க்கும் மேற்பட்ட காரைக்கால் மீனவர்கள் இலங்கை கடற்படையினரால் தாக்கப்பட்டு சிறைபிடிக்கப்பட்டனர்.