இந்தியா-மோரீஷஸ் 8 ஒப்பந்தங்கள்

இரு பிரதமர்கள் முன்னிலையில் கையொப்பம்

- 

போர்ட் லூயிஸ், மார்ச் 12: கடல்சார் பாதுகாப்பு, வர்த்தகம் உள்பட பல்வேறு துறைகளில் ஒத்துழைப்பை வலுப்படுத்த இந்தியா-மோரீஷஸ் இடையே 8 ஒப்பந்தங்கள் புதன்கிழமை கையொப்பமாகின.

மோரீஷஸ் தலைநகர் போர்ட் லூயிஸில் பிரதமர் மோடி மற்றும் அந்நாட்டு பிரதமர் நவீன்சந்திரராம் கூலம் இடையிலான இருதரப்பு பேச்சுவார்த்தைக்குப் பின் இந்த ஒப்பந்தங்கள் கையொப்பமிடப்பட்டன.

மேற்கு இந்திய பெருங்கடலில் அமைந்துள்ள தீவு நாடான மோரீஷஸுக்கு பிரதமர் மோடி இரண்டு நாள் அரசுமுறைப் பயணமாக செவ்வாய்க்கிழமை வந்தார். முதல் நாளில், அதிபர் தரம்வீர் கோகுலை சந்தித்துப் பேசிய அவர், இந்திய சமூகத்தினரின் நிகழ்ச்சியிலும் கலந்து கொண்டு உரையாற்றினார். அப்போது, மோரீஷஸ் நாட்டை 'குட்டி இந்தியா' என்று பிரதமர் வர்ணித்தார். 12 லட்சம் மக்கள்தொகை கொண்ட மோரீஷஸில் 70 சதவீதம் பேர் இந்திய வம்சாவளிகளாவர்.