வக்ஃப் சொத்துகளின் தன்மை மே 5 வரை மாற்றப்படாது

உச்சநீதிமன்றத்தில் மத்திய அரசு

- 

புது தில்லி, ஏப். 17: வரும் மே 5-ஆம் தேதி வரை வக்ஃப் சொத்துகளின் தன்மை மாற்றப்படாது என்பதோடு, வக்ஃப் மத்திய கவுன்சில், வாரியங்களில் எந்தவித புதிய நியமனமும் செய்யப்படாது என்று உச்சநீதிமன்றத்தில் மத்திய அரசுத் தரப்பில் வியாழக்கிழமை தெரிவிக்கப்பட்டது.

மேலும், 'இந்த விவகாரத்தில் அடுத்த ஏழு நாள்களில் முதல் கட்ட பதில் மனு தாக்கல் செய்யப்படும்' என்றும் மத்திய அரசுத் தரப்பில் தெரிவிக்கப்பட்டது.

வக்ஃப் திருத்தச் சட்டத்துக்கு எதிரான மனுக்களை உச்சநீதிமன்றத் தலைமை நீதிபதி சஞ்சீவ் கன்னா, நீதிபதிகள் சஞ்சய் குமார், கே.வி.விஸ்வநாதன் ஆகியோர் அடங்கிய அமர்வு புதன்கிழமை விசாரித்தது.

அப்போது, 'இந்த மனுக்களை விசாரிக்கும் காலகட்டத்தில் தற்போதைய வக்ஃப் சொத்துகளின் தன்மையை மாற்றக் கூடாது. பதவி வழி உறுப்பினர்களைத் தவிர வக்ஃப் வாரியங்கள் மற்றும் மத்திய வக்ஃப் கவுன்சிலின் பிற அனைத்து உறுப்பினர்களும் முஸ்லிம்களாக இருக்க வேண்டும் என இடைக்காலத் தடை விதிக்கப் போவதாக' தெரிவித்தது.

இதற்கு மத்திய அரசுத் தரப்பில் எதிர்ப்பு தெரிவிக்கப்பட்டது.

பதில் அளிக்க அனுமதிக்க வேண்டும்:

இந்த வழக்கு உச்சநீதிமன்றத் தலைமை நீதிபதி சஞ்சீவ் கன்னா தலைமையிலான மூன்று நீதிபதிகள் அமர்வில் வியாழக்கிழமை மீண்டும் விசாரணைக்கு வந்தது.