அணங்கு - முருகணங்கு - இனக் குழு வழிபாட்டு முறை

அணங்கு என்பது ஒரு தெய்வீக ஆற்றல்.

- பேராசிரியர் செ. சாரதாம்பாள்

'இயற்கையின் மிதமிஞ்சிய இயக்கங்களில் ஏதோ ஓர் ஆற்றல் உறைந்திருக்கிறது' எனப் பழங்கால மனிதன் நம்பினான். இத்தகு நம்பிக்கையில் உருவாக்கப்பட்ட கருத்தியலே 'அணங்கு' என்பதாகும்.அணங்கு என்பதற்கு அச்சம் தரும் பெண் தெய்வம், வருத்தம், நோய், கொலை, தெய்வம், தெய்வ மகள், வருத்திக்கொல்லும் பேய், சண்டாளன், அழகு, வடிவு, குட்டி' என்று தமிழ்ப்பேரகராதி பல சொற்பொருள் விளக்கங்களை விளம்புகிறது.

காடு, மலை, மரம், சுனை, நீர்வீழ்ச்சி போன்ற இடங்களிலும் குகை போன்ற பாழடைந்த இடங்களிலும் அணங்கு உறையும் எனச் சங்க இலக்கியங்கள் சுட்டுகின்றன. மேலும் அணங்கு, தான் விரும்பிய வண்ணம் உருவம் எடுக்கும் பண்புடையது; நடு இரவில் உலவும் தன்மையுடையது.

'அணங்கு' என்ற சக்தியானது வாழ்வில் வளமும் தரும்; வருத்தவும் செய்யும்; நோயும் தரும்; நோயைத் தீர்க்கவும் துணை புரியும். இத்தகைய 'அணங்கு' குறித்த பொருண்மைகளின் வழி, சங்க இலக்கியம் 'மனித ஒழுகலாறுகள் குறித்த வாழ்வியல் நெறிமுறைகளை' வலியுறுத்துகிறது என்பது இங்கு குறிப்பிடத்தக்கது.

இளமைப் பருவத்து, வளர்நிலையில், பூப்படைதல், தாய்மையடைதல், கருவுறுதல் போன்றவை பெண்ணுக்கே உரிய பெண்மைப் பண்புகளாகும். இத்தகு வளமை வளர்ச்சிக்குக் காரணம் அணங்கு என்ற தெய்வசக்தியே என்று பழங்கால மனிதன் நம்பினான். இதை 'பெரும்பெயர்க் கூடல் அன்னநின் கரும்புடைத் தோளும் உடையவால் அணங்கே'(நற். 39) என்ற நற்றிணை சுட்டுகிறது.