நக்ஸல்களுடன் பேச்சு கிடையாது: அமித் ஷா உறுதி

நக்ஸல் தீவிரவாதிகள் ஆயுதங்களைக் கைவிட்டு, வளர்ச்சிப் பயணத்தில் இணைய வேண்டும்; அவர்களுடன் பேச்சுவார்த்தை அவசியமில்லை என்று மத்திய உள்துறை அமைச்சர் அமித் ஷா தெரிவித்தார்.

- 

ராய்பூர், ஜூன் 22:

நாட்டில் நக்ஸல் தீவிரவாதிகளுக்கு எதிரான பாதுகாப்புப் படையினரின் நடவடிக்கைகள் தீவிரப்படுத்தப்பட்டுள்ளன. நக்ஸல் தலைவர்கள் உள்பட அந்த இயக்கத்தினர் சுட்டுக் கொல்லப்பட்டுவரும் நிலையில், அவர்களுடன் அரசு பேச்சுவார்த்தையில் ஈடுபட வேண்டும் என்று இடதுசாரி கட்சிகள் கோரிக்கை விடுத்தன. ஆனால், நக்ஸல்களுடன் பேச்சுவார்த்தை கிடையாது என்பதை உள்துறை அமைச்சர் அமித் ஷா உறுதிபடுத்தியுள்ளார்.

சத்தீஸ்கர் மாநிலம், நவராய்பூர் அடல் நகரில் தேசிய தடய அறிவியல் பல்கலைக்கழக வளாகம் மற்றும் மத்திய தடய அறிவியல் ஆய்வகம் அமைக்க அமித் ஷா ஞாயிற்றுக்கிழமை அடிக்கல் நாட்டினார். அப்போது, அவர் பேசியதாவது:

வழக்கமாக மழைக் காலங்களில் அடர் வனப் பகுதிகளில் ஏற்படும் காட்டாற்று வெள்ளத்தால் நக்ஸல்களுக்கு எதிரான நடவடிக்கை நிறுத்தி வைக்கப்படும். ஆனால், இம்முறை மழைக்காலத்தில் நக்ஸல்கள் ஓய்வெடுக்க அனுமதிக்க மாட்டோம். 2026, மார்ச் 31-ஆம் தேதிக்குள் நக்ஸல்களை ஒழிக்கும் இலக்கை எட்டும் வகையில், மழைக்கு மத்தியிலும் அதிர்வடி நடவடிக்கைகள் தொடரும்.