நாகை, மயிலாடுதுறையில் மகளிர் தின விழா கொண்டாட்டம்

நாகை, மயிலாடுதுறை மாவட்டங்களில் பல்வேறு இடங்களில் மகளிர் தின விழா சனிக்கிழமை கொண்டாடப்பட்டது.

- 

நாகப்பட்டினம்/மயிலாடுதுறை, மார்ச் 8: நாகை, மயிலாடுதுறை மாவட்டங்களில் பல்வேறு இடங்களில் மகளிர் தின விழா சனிக்கிழமை கொண்டாடப்பட்டது.

நாகை: சர் ஐசக் நியூட்டன் சித்த மருத்துவக் கல்லூரி, சர் ஐசக் நியூட்டன் இயற்கை மற்றும் யோகா மருத்துவக் கல்லூரி, நாகை ரோட்டரி சங்கம் மற்றும் ஆபரணதாரி சமுதாய குழுமம் இணைந்து மகளிர் தினத்தையொட்டி, ஆரோக்கிய நல வாழ்வு இயற்கை மருத்துவ முகாம் தொடக்கப் பள்ளி வளாகத்தில் நடத்தியது.

நாகை ரோட்டரி சங்கத் தலைவர் பாப்பா கண்ணன் தலைமையில் நடைபெற்ற முகாமில் 350-க்கும் மேற்பட்டோர் கலந்து கொண்டு தோல் நோய்கள், மூட்டு வீக்கம், ஆஸ்துமா, மாதவிடாய் கோளாறுகள், பக்கவாதம், தோள்பட்டை வலி, குதிகால் வலி, மூலம் பவுத்திரம், தூக்கமின்மை, சைனஸ், நீரிழிவு உள்ளிட்ட பல்வேறு நோய்களுக்கு இலவசமாக மருத்துவ ஆலோசனை மற்றும் மருந்துகள் பெற்றனர்.

நாகை ரோட்டரி சங்க முன்னாள் தலைவர் இளமாறன், ஆபரணதாரி ஆனந்தன், நிர்வாக அலுவலர் சீனிவாசன், பாலிடெக்னிக் விரிவுரையாளர்கள் மணிகண்ட பிரபு, நவீன், பொறியியல் கல்லூரி பேராசிரியர்கள் சிலம்பரசன், சுந்தர்ராஜன் உள்ளிட்ட பலர் கலந்து கொண்டனர்.