குடிமைப் பணி தேர்வுக்கு பயிற்சி மையம் கட்டாயமா?

குடிமைப் பணி தேர்வெழுதி வெற்றி பெற ஏதாவது ஒரு பயிற்சி மையத்தில் சேர்வது கட்டாயம் என்ற எண்ணம் பெரும்பாலான மாணவர்களிடம் உள்ளது.

- இரா. மகாதேவன்

சுமார் 30 ஆண்டுகளுக்கு முன்பு இது போன்ற பயிற்சி மையங்கள் கிடையாது. பெருநிறுவன பயிற்சி மையங்கள் இல்லாமலேயே அன்றைய இளைஞர்கள் தேர்வுக்கு தயாராகி வெற்றிபெற்று அதிகாரிகளாகப் பரிணமித்தனர்.

இன்றைய மாணவர்கள் அதுபோன்று வெற்றிபெற்ற முன்னோடிகளை தேடிச் சென்று உரையாட வேண்டும். அவர்களின் திட்டமிடலை தெரிந்துகொண்டு, அந்த வழிகளைப் பின்பற்ற வேண்டும். எதையும் எளிதாக அடைந்துவிட வேண்டும் என்ற சிந்தனையைப் புறந்தள்ளி, ஒரு சாதனையை நிகழ்த்த எந்த சிரமத்தையும் எதிர்கொள்ளும் பக்குவத்தை ஏற்படுத்திக்கொள்ள வேண்டும்.

தேர்வுக்கான முன்தயாரிப்பு குறித்து தற்போதுள்ள மாணவர்கள், இளைஞர்கள் சிலவற்றை அறிந்துகொள்வது அவசியம். அனைத்து மாவட்ட மைய நூலகங்களிலும் வழக்கமாக, நாளிதழ்கள், சிற்றிதழ்கள் வாசிக்கும் இடம்தவிர, போட்டித் தேர்வுக்கு இளைஞர்கள் தயாராவதற்கான இடமும் ஒதுக்கப்பட்டிருக்கிறது. இங்கு நாள்முழுவதும் அமர்ந்து மாணவர்கள் தேர்வுக்கு தயாராகலாம்.

அனைத்துப் போட்டித் தேர்வுகளிலும் பங்கேற்கும் வகையிலான அதிக விலை கொண்ட புத்தகங்களும், மேலதிக தகவல் பெற இணைய வசதி, நகலெடுக்கும் வசதி போன்றவற்றையும் பயன்படுத்திக்கொள்ளலாம். அத்துடன், நூலகத்தில் போட்டித் தேர்வுகளுக்காக நடத்தப்படும் பயிற்சி வகுப்புகள், வழிகாட்டும் நிகழ்ச்சிகளில் பங்கேற்கும் வாய்ப்பும் ஏற்படுத்தப்பட்டுள்ளது.