அமைச்சர் கே.என்.நேரு வீடு உள்பட 15 இடங்களில் அமலாக்கத் துறை சோதனை

பண முறைகேடு புகார்

- 

சென்னை/திருச்சி, ஏப். 7: பண முறை கேடு புகார் தொடர்பாக அமைச்சர் கே.என்.நேரு, அவரின் குடும்பத்தினர் வீடு, அலுவலகங்கள் உள்பட 15 இடங்களில் அமலாக்கத் துறையினர் திங்கள்கிழமை சோதனை நடத்தினர்.

தமிழக நகராட்சி நிர்வாகத்துறை அமைச்சராக இருக்கும் கே.என். நேருவின் சகோதரர்கள் ரவிச்சந்திரன், மணிவண்ணன் ஆகியோர் டிவிஎச் (ட்ரூ வேல்யூ ஹோம்ஸ்) என்ற பெயரில் கட்டுமான நிறுவனம், டி.வி.ஹெச் எனர்ஜி ரிசோர்ஸ் பிரைவேட் லிமிடெட், எனர்ட்டியா சோலார் இன்ஃப்ரா, எனர்ட்டியா இன்ஃப்ரா, ட்ரூ வேல்யூ ரியல் எஸ்டேட் என பல்வேறு தொழில் நிறுவனங்களை நடத்தி வருகின்றனர். இந்த நிறுவனங்களில் கே.என்.நேரு மகனும் பெரம்பலூர் மக்களவைத் தொகுதி உறுப்பினருமான அருண் நேருவும் பங்குதாரராக உள்ளதாகக் கூறப்படுகிறது.

வருமான வரித் துறை சோதனை: இந்த நிறுவனத்தினர் வரி ஏய்ப்பில் ஈடுபட்டதாக 2018-ஆம் ஆண்டு வருமான வரித் துறையினர் சோதனை நடத்தினர். இந்தச் சோதனையில் பல முக்கிய ஆவணங்கள் கைப்பற்றப்பட்டன. அந்த ஆவணங்களை ஆய்வு செய்த வருமானவரித் துறையின் புலனாய்வுப் பிரிவு, பண முறைகேடு தொடர்பான முகாந்திரம் இருந்ததால் அமலாக்கத் துறை விசாரணைக்கு பரிந்துரைத்தது.