இந்தியா-சிங்கப்பூர் வர்த்தக உறவை வலுப்படுத்த முடிவு

உலகளாவிய ஸ்திரமற்ற புவி-அரசியல் சூழலைக் கருத்தில்கொண்டு, இந்தியா-சிங்கப்பூர் வர்த்தக உறவு, சந்தை அணுகலை வலுப்படுத்த பிரதமர் நரேந்திர மோடி, பிரதமர் லாரன்ஸ் வாங் முடிவு செய்தனர்.

- 

புது தில்லி, செப். 4:

இரு தரப்பு நல்லுறவை விரிவான வியூக கூட்டாண்மை அந்தஸ்துக்கு உயர்த்துவதற்கான செயல் திட்டத்தையும் அவர்கள் வெளியிட்டனர்.

இந்தியாவுக்கு அரசுமுறை பயணமாக கடந்த செவ்வாய்க்கிழமை வந்த சிங்கப்பூர் பிரதமர் லாரன்ஸ் வாங், தில்லியில் பிரதமர் மோடியை புதன்கிழமை சந்தித்து பேச்சுவார்த்தை நடத்தினார்.

வர்த்தகம், முதலீடு, பாதுகாப்பு (ஆளில்லா கப்பல் தயாரிப்பு), எண்மத் தொழில்நுட்பங்கள், செயற்கை நுண்ணறிவு, செமிகண்டக்டர், அதிநவீன உற்பத்தி உள்ளிட்ட பல்வேறு துறைகளில் ஒத்துழைப்பை வலுப்படுத்துவது குறித்து இரு தலைவர்களும் விரிவாக ஆலோசித்தனர்.

5 ஒப்பந்தங்கள் கையொப்பம்: பின்னர், விமானப் போக்குவரத்து, திறன் மேம்பாடு, பசுமை-எண்மசார் கடல்வழிப் போக்குவரத்து, விண்வெளி, அடுத்த தலைமுறை நிதி உள்கட்டமைப்புக்கான எண்மசார் தரவு புத்தாக்கம் உள்ளிட்ட துறைகளில் 5 ஒப்பந்தங்கள் கையொப்பமாகின.