சிறுவன் கடத்தப்பட்ட விவகாரம்: ஜெகன்மூர்த்தி கைதானால் சொந்த ஜாமீனில் விடுவிக்க உச்சநீதிமன்றம் உத்தரவு

திருவள்ளூரைச் சேர்ந்த சிறுவன் கடத்தப்பட்ட சம்பவத்தில் கே.வி.குப்பம் எல்எல்ஏ எம்.ஜெகன்மூர்த்தியின் மேல்முறையீட்டு மனுமீது தமிழக காவல் துறை பதிலளிக்க நோட்டீஸ் அனுப்புமாறு உச்சநீதிமன்றம் திங்கள்கிழமை உத்தரவிட்டது.

- நமது நிருபர்

புது தில்லி, ஜூன் 30:

மேலும், இந்த வழக்கில் ஜெகன்மூர்த்தியை காவல் துறையினர் கைது செய்தால், நிபந்தனைக்கு உள்பட்டு அவரை சொந்த ஜாமீனில் விடுவிக்கவும் உத்தரவிட்டது. இந்த விவகாரத்தில் தனது முன்ஜாமீன் மனுவை நிராகரித்த சென்னை உயர்நீதிமன்ற உத்தரவுக்கு எதிராக ஜெகன்மூர்த்தி தாக்கல் செய்த மேல்முறையீட்டு மனு உச்சநீதிமன்ற நீதிபதிகள் மனோஜ் மிஸ்ரா, என்.கோடிஸ்வர் சிங் அடங்கிய அமர்வு முன் திங்கள்கிழமை விசாரணைக்கு வந்தது. அப்போது, மனுதாரர் சார்பில் வழக்குரைஞர் ராம்சங்கருடன் மூத்த வழக்குரைஞர்கள் சித்தார்த் லூத்ரா, பிரபாகரன் ஆகியோர் ஆஜராகி வாதங்களை முன்வைத்தனர்.