இதற்கொரு முடிவே கிடையாதா?

சிவகாசியில் சனிக்கிழமை மீண்டும் ஒரு பட்டாசு ஆலை விபத்து நிகழ்ந்திருக்கிறது. மூன்று பெண்கள் உயிரிழந்திருக்கிறார்கள்; 7 பேர் காயமடைந்திருக்கிறார்கள்.

- 

வழக்கம்போலத் தீயணைப்பு, கைது, மீட்புப் பணி, இழப்பீடு அறிவிப்பு எல்லாமே தொடர்ந்திருக்கின்றன.

சிவகாசி பட்டாசுத் தயாரிப்பு 2023-இல் தனது நூற்றாண்டைக் கொண்டாடியது. கடந்த 102 ஆண்டுகளில் ஆயிரக்கணக்கான தொழிலாளர்களின் உயிரைப் பலிகொண்டிருக்கிறது. இன்னும் கூட, பாதுகாப்பாகப் பட்டாசு தயாரிக்கும் தொழில்நுட்பம் எட்டப்படவில்லை என்பது வருத்தமளிக்கிறது. இதற்கு சாத்தியமின்மை காரணமா, முனைப்பின்மை காரணமா என்று தெரியவில்லை.

ஆண்டொன்றுக்கு ஏறத்தாழ ரூ.6,000 கோடி விற்று வரவுள்ள பட்டாசுத் தொழிலில் 3 லட்சத்துக்கும் அதிகமானோர் நேரடியாகவும், 4 லட்சத்துக்கும் அதிகமானோர் மறைமுகமாகவும் ஈடுபடுகிறார்கள். சுமார் 10 லட்சம் குடும்பங்களின் வாழ்வாதாரமாக இருக்கும் தொழில் பட்டாசுத் தயாரிப்பு. அது மட்டுமல்ல, விருதுநகர் மாவட்டத்தின் முக்கியமான வேலைவாய்ப்பும் அதுதான்.

தமிழகத்திலுள்ள 1,482 பட்டாசுத் தொழிற்சாலைகளில் 1,085 சிவகாசியிலும் சுற்றுப்புறங்களிலும்தான் செயல்படுகின்றன. பட்டாசுத் தயாரிப்பில் அனுபவம் உள்ளவர்கள் அங்குதான் அதிகமாக இருக்கிறார்கள். அவர்களில் 55 சதவீதம் பேர் பெண்கள். ஏறத்தாழ 8 முதல் 9 மாதங்கள் பட்டாசுத் தயாரிப்பில் ஈடுபடும் ஆயிரக்கணக்கான பெண்கள், பெரும்பாலும் கைத்தொழிலாகத்தான் ஈடுபடுகிறார்கள்.