வாழை ஏற்றுமதிக்கு இலக்கு: விவசாயிகளுக்கு அறிவுறுத்தல்

வாழை ஏற்றுமதி செய்வதற்கு விவசாயிகள் இலக்கு நிர்ணயித்துக் கொள்ள வேண்டும் என்று பெங்களூரு இந்திய வேளாண் ஆராய்ச்சி நிறுவனத்தின் இயக்குநர் துஷார் காந்தி பெஹேரா அறிவுறுத்தினார்.

- 

திருச்சி, ஆக. 21: வாழை ஏற்றுமதி செய்வதற்கு விவசாயிகள் இலக்கு நிர்ணயித்துக் கொள்ள வேண்டும் என்று பெங்களூரு இந்திய வேளாண் ஆராய்ச்சி நிறுவனத்தின் இயக்குநர் துஷார் காந்தி பெஹேரா அறிவுறுத்தினார்.

திருச்சி தேசிய வாழை ஆராய்ச்சி மையத்தின் 32-ஆவது நிறுவன நாள் மற்றும் விவசாயிகள் விழா ஆராய்ச்சி மையத்தில் வியாழக்கிழமை நடைபெற்றது. நிகழ்ச்சிக்கு தேசிய வாழை ஆராய்ச்சி மையத்தின் இயக்குநர் ஆர்.செல்வராஜன் தலைமை வகித்தார்.

சிறப்பு விருந்தினராக கலந்து கொண்ட பெங்களூரு இந்திய வேளாண் ஆராய்ச்சி நிறுவனத்தின் இயக்குநர் துஷார் காந்தி பெஹேரா, விவசாயிகள், பல்வேறு விவசாய தொழில்நுட்ப நிறுவனங்கள், விவசாய உற்பத்தியாளர் நிறுவனங்களுக்கு விருதுகளை வழங்கி பேசியதாவது: விவசாயிகளுக்காக நாட்டில் பல்வேறு ஆராய்ச்சி நிறுவனங்கள் செயல்பட்டு வருகின்றன. இதில், திருச்சி தேசிய வாழை ஆராய்ச்சி நிறுவனம் குறிப்பிடத்தக்கது. இந்நிறுவனம், வாழை விவசாயிகளுக்காக பல்வேறு தொழில்நுட்பங்களை உருவாக்கியுள்ளது. வாழை விவசாயிகள் உற்பத்தியில் மட்டும் கவனம் செலுத்தாமல் வாழை பொருள்கள் ஏற்றுமதியிலும் கவனம் செலுத்த வேண்டும் என்றார் அவர்.