மருத்துவப் படிப்பில் 7.5% இடஒதுக்கீட்டுக்கு யார் காரணம்?

மருத்துவப் படிப்பில் 7.5 சதவீத இடஒதுக்கீட்டுக்கு யார் காரணம் என்பது குறித்து பேரவையில் விவாதம் நடைபெற்றது.

- 

சென்னை, ஏப். 23:

7.5 சதவீத அரசு ஒதுக்கீட்டில் மருத்துவ இளநிலைப் படிப்பில் சேர்க்கை பெற்ற மாணவர்களுக்கான கட்டணங்கள் குறித்து, சட்டப்பேரவையில் புதன்கிழமை கவன ஈர்ப்பு அறிவிப்பு கொண்டு வரப்பட்டது. இதன் மீது, விசிக உறுப்பினர் எஸ்.எஸ்.பாலாஜி, அதிமுக உறுப்பினர் சி.விஜயபாஸ்கர், தமிழக வாழ்வுரிமைக் கட்சியின் தி.வேல்முருகன் ஆகியோர் பேசினர்.

அப்போது நடந்த விவாதம்:

எஸ்.எஸ்.பாலாஜி: 7.5 சதவீத இட ஒதுக்கீட்டின் கீழ் தனியார் பல்கலைக்கழகங்களில் சேரும் மாணவர்களிடம் கட்டணம் வசூலிக்கப்படுகிறது. இதனால் மாணவர்களும், பெற்றோர்களும் கடுமையான மனஉளைச்சலுக்கு உள்ளாகின்றனர்.

இதுபோன்ற சூழ்நிலையில், மாணவர்கள் எப்படி அரசின் சார்பிலான குழுவிடம் புகார்களை அளிப்பார்கள்? நிகர்நிலைப் பல்கலைக்கழகங்களில் படிக்கும் மாணவர்கள் கட்டணத்தைச் செலுத்தவில்லை எனக் கூறி தேர்வு எழுத அனுமதிப்பதில்லை. அந்தப் பல்கலைக்கழகங்களையும் அரசின் கண்காணிப்பில் கொண்டுவர வேண்டும்.

சி.விஜயபாஸ்கர்: 7.5 சதவீத இட ஒதுக்கீட்டின் கீழ் சேரும் மாணவர்களுக்கான அனைத்து கட்டணங்களையும் அரசே ஏற்கும் என அறிவிக்கப்பட்டது. ஆனால், சில கல்லூரிகளில் அடிப்படைப் பொருள்களை பணம் கொடுத்து மாணவர்களே வாங்கிக் கொள்ள வேண்டுமெனக் கூறுகிறார்கள். அதன்பிறகு, அதற்கான பணத்தை தருகிறார்கள். எனவே, அது போன்ற நிலைகளைத் தவிர்க்க வேண்டும். பயிற்சி பெறும்போது, மாணவர்களுக்கு அளிக்க வேண்டிய மாதாந்திர தொகையை சில சுயநிதிக் கல்லூரிகள் தருவதில்லை.

தி.வேல்முருகன்: சுயநிதிக் கல்லூரிகள் அரசு நிர்ணயித்த கட்டணங்களைப் பெற்றுக் கொள்வதில்லை. அதிகமான கட்டணங்களை வசூல் செய்கிறார்கள். இதைக் கட்டுப்படுத்த வேண்டும்.