பேரவையில் முதல்வர் - எதிர்க்கட்சித் தலைவர் கடும் விவாதம்

நீட் தேர்வு, தேசியக் கட்சிகளுடன் திராவிடக் கட்சிகள் கூட்டணி அமைத்திருப்பது ஆகியவை தொடர்பாக சட்டப்பேரவையில் முதல்வர் மு.க.ஸ்டாலின், எதிர்க்கட்சித் தலைவர் எடப்பாடி கே.பழனிசாமி இடையே திங்கள்கிழமை கடும் விவாதம் நடைபெற்றது.

- 

சென்னை, ஏப். 21:

சட்டப்பேரவையில் மருத்துவம் - மக்கள் நல்வாழ்வுத் துறை மானியக் கோரிக்கை மீது திங்கள்கிழமை நடைபெற்ற விவாதம்:

போக்குவரத்துத் துறை அமைச்சர் எஸ்.எஸ்.சிவசங்கர்: அதிமுக ஆட்சியில் 11 மருத்துவக் கல்லூரிகளுக்கு மத்திய அரசு ஏன் அனுமதி கொடுத்தது? நீட் தேர்வு எனும் துரோகத்துக்கு ஈடாக கொடுத்ததுதான் மருத்துவக் கல்லூரிகள்.

எதிர்க்கட்சித் தலைவர் எடப்பாடி கே.பழனிசாமி: 2010-ஆம் ஆண்டு நீட் தேர்வு கொண்டுவரப்பட்டது. அப்போது மத்தியில் யாருடைய ஆட்சி இருந்தது? மருத்துவத் துறையில் அமைச்சராக திமுகவை சேர்ந்த காந்தி செல்வன் இருக்கும்போது, அறிவிக்கை கொண்டு வரப்பட்டது. அதைத் தடுப்பதற்கு நடவடிக்கை எடுக்க முயற்சித்தது அதிமுக.

அமைச்சர் சிவசங்கர்: முன்னாள் முதல்வர்கள் கருணாநிதி, ஜெயலலிதா முதல்வராக இருக்கும் வரை நீட் தேர்வுக்கு அனுமதி தரப்படவில்லை. உங்களுடைய ஆட்சியில் அனுமதிக்கப்பட்டது. இதனால்தான் 11 மருத்துவக் கல்லூரிகள் கிடைத்தன.

கு.செல்வப்பெருந்தகை (காங்கிரஸ்): ஜெயலலிதா ஆட்சிக்காலத்தில்கூட நீட் தேர்வு அனுமதிக்கப்படவில்லை. அனுமதித்தது யார் என்பது அனைவருக்கும் தெரியும்.