வீட்டு உபயோக சமையல் எரிவாயு சிலிண்டர் விலை ரூ.50 உயர்வு

வீட்டு உபயோக (14.2 கிலோ) சமையல் எரிவாயு சிலிண்டர் விலையை ரூ. 50 வீதம் எண்ணெய் நிறுவனங்கள் திங்கள் கிழமை உயர்த்தின.

- 

புது தில்லி, ஏப். 7:

இதனால், ரூ. 818.50-க்கு விற்பனை செய்யப்பட்டு வந்த சமையல் எரிவாயு சிலிண்டர் விலை தற்போது ரூ. 868.50-ஆக அதிகரித்துள்ளது.

இதுகுறித்து மத்திய பெட்ரோலிய அமைச்சகம் வெளியிட்ட செய்தியில், 'வறுமைக்கோட்டுக் குக் கீழ் உள்ள குடும்பங்களுக்கான உஜ்வலா திட்ட பயனாளிகள் மற்றும் பொதுப் பிரிவு பயனாளிகள் என இரு தரப்பினருக்குமான வீட்டு உபயோக சிலிண்டர் விலையை ரூ. 50 வீதம் எண்ணெய் நிறுவனங்கள் உயர்த்தியுள்ளன' என்று தெரிவிக்கப்பட்டுள்ளது.

இந்த விலை உயர்வு காரணமாக உஜ்வலா திட்டத்தின் கீழான சிலிண்டர் விலை ரூ.503-லிருந்து ரூ. 553-ஆக அதிகரித்துள்ளது.

சிஎன்ஜி கிலோவுக்கு ரூ.1 உயர்வு: கார், ஆட்டோ, பேருந்துகளில் பயன்படுத்தப்படும் 'சிஎன்ஜி' இயற்கை எரிவாயு விலை கிலோவுக்கு ரூ. 1 வீதம் உயர்த்தப்பட்டுள்ளது. இதனால், தலைநகர் தில்லியில் ஒரு கிலோ சிஎன்ஜி விலை ரூ. 75.09-ஆக அதிகரித்துள்ளது.