வழக்குரைஞர் உள்பட பலரை மிரட்டி பணம் பறித்த போலி நிருபர்கள் 2 பேர் கைது

கரூர் மாவட்டம், குளித்தலையில் வழக்குரைஞர், அரசு அலுவலர் உள்ளிட்டோரை மிரட்டி பணம் பறித்த போலி நிருபர் 2 பேரை போலீஸார் வியாழக்கிழமை கைது செய்தனர்.

- 

கரூர், மார்ச் 27: இது தொடர்பான வழக்கில் தொடர்புடைய மேலும் 3 பேரை தேடி வருகின்றனர்.

குளித்தலை அண்ணா நகரைச் சேர்ந்தவர் கார்த்திகேயன். வழக்குரைஞரான இவர் அப்பகுதியில் தனக்கு சொந்தமான இடத்தில் வணிக வளாகம் கட்டி வாடகைக்கு விட்டுள்ளார். இவரிடம், குளித்தலையை அடுத்த அய்யர்மலையைச் சேர்ந்த சண்முகசுந்தரம் என்பவர், தான் மாத இதழ் ஒன்றில் சிறப்பு நிருபராக பணியாற்றி வருவதாகவும், செந்தில்குமார் (42) என்பவர், அந்த இதழின் சிறப்பு ஆசிரியராகவும், குப்புரெட்டிப்பட்டியைச் சேர்ந்த என். சந்திரன் (40) என்பவர் நாளிதழ் ஒன்றில் மாவட்டச் செய்தியாளராக பணியாற்றி வருவதாகவும் கூறி, நீங்கள் வாடகைக்கு விட்டுள்ள வணிகக் கட்டடம் உரிய விதிமுறைகளின்படி கட்டப்படவில்லை. எனவே, எங்களுக்கு பணம் தராவிட்டால், வணிக வளாகக் கட்டடத்தை இடிப்பதற்கு தேவையான அனைத்து நடவடிக்கைகளையும் மேற்கொள்வோம் எனக் கூறி கடந்த 10 நாள்களுக்கு முன் பகிரங்கமாக மிரட்டி உள்ளனர்.