விரிவுபடுத்த வேண்டும்!

விவசாயிகள் என்று சொன்னால் நெல், கோதுமை, கரும்பு உள்ளிட்ட பணப்பயிர்கள் பயிரிடும் விவசாயிகள்தான் அரசின் கவனத்தை ஈர்க்கிறார்கள்.

- 

அதிகமான விளைச்சல் பரப்பில் பயிரிடுபவர்கள் என்பதால் அவர்கள் அதிக கவனம் பெறுவதில் வியப்பொன்றுமில்லை. அதே நேரத்தில் காய்கறிகள், பழங்கள் உள்ளிட்டவை பயிரிடும் விவசாயிகளின் நலன் பேணப்படாமல் இருப்பது வருத்தத்தை ஏற்படுத்துகிறது.

தக்காளி உள்ளிட்ட காய்கறிகள், பால் போன்றவை போதிய விலை பெறாமல் போகும்போது, விவசாயிகள் மனக்கொதிப்பில் அவற்றை சாலைகளில் கொட்டிப் போராடுவது என்பது அவ்வப்போது நடக்கும் நிகழ்வாக நாடு தழுவிய அளவில் தொடர்கிறது. அதேபோல, மல்லிகை, ரோஜா, சாமந்தி உள்ளிட்ட மலர் விவசாயத்தில் ஈடுபடும் வேளாண் பெருமக்களும் தங்களது விளைபொருள்களுக்கு போதிய விலை கிடைக்காமல் அவற்றை வீணாக்குவதும் அவ்வப்போது நிகழ்கிறது.

பணப்பயிர்களைப் போல பெரும் நிலப்பரப்பில் விவசாயம் செய்யப்படுபவை அல்ல, காய்கறிகளும், மலர் வகைகளும். வாழை, மா, எலுமிச்சை, கறிவேப்பிலை, முருங்கை, கேரட், முள்ளங்கி, முட்டைக்கோஸ், காலிஃபிளவர், உருளைக்கிழங்கு போன்றவை விதிவிலக்குகள். அவற்றிலுமேகூட, அதிக விளைச்சல் ஏற்படும் போது, போதிய விலை கிடைக்காமல் விவசாயிகள் இழப்பை எதிர்கொள்கிறார்கள்.

விளைந்த தக்காளி பழத்தை சாலைகளில் கொட்டியும், விளைந்த வயல்களிலேயே அழித்தும் வருவது வேதனை அளிப்பதாக உள்ளது. இடுபொருள்களுக்கான விலைகூட கிடைக்காததால் அவற்றை அழிக்க வேண்டிய நிலைக்கு விவசாயிகள் தள்ளப்பட்டுள்ளனர். ஆனால், அதே பொருள்கள் நுகர்வோருக்கு கிலோ ரூ. 25 முதல் ரூ. 30 வரையில் சந்தையில் விற்பனை செய்யப்படுகிறது.