செயற்கை ரத்தம்...

உலக அளவில் கோடிக்கணக்கான உயிர்களைக் காப்பாற்றக் கூடிய எல்லா பிரிவு ரத்தத்துக்கும் பொருந்தக் கூடிய புதிய வகை செயற்கை ரத்தத்தை ஜப்பான் விஞ்ஞானிகள் உருவாக்கியுள்ளனர்.

- -சக்ரவர்த்தி

அறுவைச் சிகிச்சைகள், விபத்துகள், பிரசவம், புற்றுநோய் சிகிச்சைகளின்போது நோயாளியின் உயிரைக் காக்க ரத்த மாற்றம், ரத்தம் செலுத்துதல் மிகவும் அவசியமாகிறது. ரத்த வங்கிகளில் பெரும்பாலும் ரத்தம் இருப்பு குறைவாகவே இருக்கும். தேவைப்படுகிற அல்லது அரிய வகை ரத்தப் பிரிவு உடனே கிடைக்காது. உலக நாடுகளில் அனைவரும் ரத்தத் தானம் செய்வதில்லை என்பதால், ரத்தப் பற்றாக்குறை அனைத்துக் காலத்திலும் இருக்கும். அதனால்தான் நோயாளியின் உறவினர்கள், நண்பர்களை நோயாளிக்காக ரத்தம் ஏற்பாடு செய்யக் கூறுகின்றனர். ரத்தம் கிடைக்க காலதாமதமானால், நோயாளிக்கு ஒவ்வொரு நொடியும் அபாயமானதாக அமையும்.

அவசரக் காலங்களில் ரத்தம், குறிப்பிட்ட பிரிவு ரத்தம் கிடைக்காமல் உலகம் எங்கும் மக்கள் அவதிப்படுகின்றனர். ரத்த வங்கிகளாலும் ரத்தத் தேவையைச் சமாளிக்க முடிவதில்லை.