பெண்ணையாறு வழக்கில் தீர்ப்பை ஒத்திவைத்த உச்சநீதிமன்றம்

பெண்ணையாறு விவகாரத்தில் கர்நாடக அரசு விதிகளை மீறி செயல்படுவதாக குற்றஞ்சாட்டியும், அதைத் தடுக்க நடவடிக்கை எடுக்கக் கோரியும் தமிழக அரசு தொடர்ந்த வழக்கில் தீர்ப்பை தேதி குறிப்பிடாமல் உச்சநீதிமன்றம் வெள்ளிக்கிழமை ஒத்திவைத்தது.

- நமது நிருபர்

தமிழகம், கர்நாடகம் இடையேயான பெண்ணையாறு பிரச்னை தொடர்பான வழக்கு கடந்த 6 ஆண்டுகளாக உச்சநீதிமன்றத்தில் நடைபெற்று வருகிறது. பெண்ணையாறு விவகாரத்தில் கர்நாடகா விதிகளை மீறி செயல்படுவதாக உச்சநீதிமன்றத்தில் தமிழகம் சார்பில் வழக்கு தொடரப்பட்டுள்ளது.

பெண்ணையாற்றின் குறுக்கே கர்நாடகம் சட்டத்திற்கு புறம்பாக பெரிய அணைக்கான கட்டுமானப் பணிகளை மேற்கொண்டு வருகிறது. இதனால், தமிழகத்திற்கான தண்ணீர் உரிமை முற்றிலும் பறிக்கப்பட்டு மக்களின் வாழ்வாதாரம் பாதிக்கப்படும் எனக்கூறி இந்த வழக்கு தொடரப்பட்டது.

இதனை விசாரித்த உச்சநீதிமன்றம் பெண்ணையாறு விவகாரத்தில் நடுவர் மன்றம் அமைத்து தீர்வு காணுமாறு 2019 ஆம் ஆண்டு உத்தரவிட்டது.

ஆனால், மத்திய அரசால் தீர்ப்பாயம் விரைந்து அமைக்கப்படாமல் இருந்தது.

இதையடுத்து, தமிழகம், கர்நாடகம் இடையேயான பெண்ணையாறு பிரச்னைக்கு தீர்வு காண பேச்சுவார்த்தை குழு அமைக்குமாறு கடந்த ஆண்டு ஜனவரி மாதம் உச்சநீதிமன்றம் மத்திய அரசுக்கு உத்தரவிட்டது.