ரவிசங்கர் பிரசாத் தலைமையிலான குழு பிரான்ஸ் பயணம்

பாகிஸ்தான் ஆதரவு பயங்கரவாதத்துக்கு எதிரான இந்திய நிலைப்பாட்டை எடுத்துரைக்க முன்னாள் மத்திய அமைச்சரும் பாஜக எம்.பி.யுமான ரவிசங்கர் பிரசாத் தலைமையிலான குழு திங்கள்கிழமை பிரான்ஸ் சென்றடைந்தது.

- 

பாரீஸ், மே 26:

பிரிட்டன், பிரான்ஸ், ஜெர்மனி, ஐரோப்பிய ஒன்றியம், இத்தாலி மற்றும் டென்மார்க் ஆகிய 6 நாடுகள் சுற்றுப்பயணத்தின் முதல்கட்டமாக ரவிசங்கர் பிரசாத் குழு பிரான்ஸ் சென்றுள்ளது.

பிரான்ஸ் நாடாளுமன்ற உறுப்பினர்கள், வெளியுறவு அமைச்சக அதிகாரிகள் உள்ளிட்டோரை சந்தித்து பாகிஸ்தான் ஆதரவு பயங்கரவாதத்துக்கு எதிரான இந்தியாவின் நிலைப்பாட்டை இந்தக்குழு விளக்கவுள்ளது.

இதுகுறித்து பிடிஐ நிறுவனத்துக்கு ரவிசங்கர் பிரசாத் அளித்த பேட்டியில், ‘அமைதி மற்றும் இணக்கத்தை விரும்பும் நாடாகவே இந்தியா இருந்து வருகிறது. இருப்பினும், அப்பாவி மக்களை பயங்கரவாதிகள் கொலை செய்யும்போது கடுமையான பதிலடி கொடுப்பதைத் தவிர வேறு வழியில்லை. பஹல்காமில் மிகவும் காட்டுமிராண்டித்தனமான தாக்குதலை பாகிஸ்தான் ஆதரவு பயங்கரவாதிகள் நடத்தியுள்ளனர்.

பயங்கரவாதம் என்பது இந்தியாவின் தனிப்பட்ட பிரச்னை யல்ல; அது புற்றுநோய்போல் உலகம் முழுவதும் பரவக்கூடியது. பிரான்ஸ், பிரிட்டன், பெல்ஜியம் போன்ற நாடுகளும் பயங்கரவாதத்தால் பாதிக்கப்பட்டுள்ளன. அதை எதிர்க்க உலக நாடுகள் ஒருங்கிணைந்து ஒருமித்த குரலாக ஒலிக்க வேண்டும்’ என்றார்.