தூண்டப்பட்ட கலவரம்!

மேற்கு வங்கத்தில் ஓரளவுக்கு அமைதி திரும்பி இருக்கிறது என்பது சற்று ஆறுதல். ஆனாலும், நீறுபூத்த நெருப்பாக பிரச்னை இன்னும் தொடர்கிறது என்பதை நாம் நினைவில் கொள்ள வேண்டும்.

- 

முற்றிலுமாக இயல்பு வாழ்க்கை திரும்பிவிட்டது என்று சொல்லிவிட முடியாத நிலையில், எப்போது வேண்டுமானாலும் மீண்டும் மிகப்பெரிய வன்முறை வெடிக்கக் கூடும்.

மேற்கு வங்க சட்டப்பேரவைத் தேர்தலுக்கு இன்னும் ஓராண்டு மட்டும் இருக்கும் நிலையில், மக்களின் மத உணர்வுகளைத் தூண்டிவிட்டு அதில் குளிர்காய ஆளும் திரிணமூல் காங்கிரஸ் கட்சியும், எதிர்க்கட்சியான பாரதிய ஜனதா கட்சியும் முயற்சிக்கின்றன. இது போன்ற மதக் கலவரங்கள் மூலம் திரிணமூல் காங்கிரஸ் சிறுபான்மையினரின் வாக்குகளையும், பாஜக ஹிந்துக்களின் வாக்குகளையும் குறிவைத்து அரசியல் செய்கின்றன.

தனது மாநிலத்தில் வக்ஃப் திருத்தச் சட்டம் அமல்படுத்தப்படாது என்று அறிவித்த மேற்கு வங்க முதல்வர் மம்தா பானர்ஜி, மத்திய அரசுக்கு எதிராக வக்ஃப் திருத்தச் சட்ட எதிர்ப்பாளர்கள் போராட்டத்தில் ஈடுபட வேண்டும் என்று அறைகூவல் விடுத்தது, கலவரம் மேலும் தீவிரமடைய வழிகோலியிருக்கிறது. முர்ஷிதாபாத் மாவட்டத்தில் ஏப். 8-ஆம் தேதி போராட்டம் ஆரம்பித்தது; ஏப். 11, 12-ஆம் தேதிகளில் வன்முறை மேலும் தீவிரமடைந்தது.

கொல்கத்தாவில் இமாம்கள், முஸ்லிம் சமூகத் தலைவர்கள் கூட்டத்தை கடந்த புதன்கிழமை (ஏப். 16) கூட்டிய முதல்வர் மம்தா பானர்ஜி, தனது அரசியல் லாபத்துக்காக பாஜகவும், அதன் கட்டுப்பாட்டில் உள்ள எல்லைப் பாதுகாப்புப் படையும்தான் (பிஎஸ்எஃப்) இந்தக் கலவரத்தைத் தூண்டின என்று பகிரங்கமாகக் குற்றஞ்சாட்டினார். இந்தக் கலவரத்துக்கு முதல்வர் மம்தா பானர்ஜிதான் காரணம் என்று எதிர்க்கட்சியான பாஜக கூறுகிறது.