மக்கள் ஆதரவுடன் திராவிட மாடல் ஆட்சி தொடரும்

முதல்வர் மு.க.ஸ்டாலின்

- 

சென்னை, மே 7: தமிழ்நாட்டு மக்களின் ஆதரவுடன் திராவிட மாடல் ஆட்சி அடுத்த சட்டப்பேரவைத் தேர்தலுக்குப் பிறகும் தொடரும் என்று முதல்வர் மு.க.ஸ்டாலின் நம்பிக்கை தெரிவித்தார்.

திமுக அரசு நான்கு ஆண்டுகளை நிறைவு செய்து ஐந்தாவது ஆண்டில் அடியெடுத்து வைத்துள்ளது. இதையொட்டி, சென்னை கோட்டூர்புரம் அண்ணா நூற்றாண்டு நூலகத்தில் புதன்கிழமை நடைபெற்ற நிகழ்ச்சியில் முதல்வர் ஸ்டாலின் பேசியதாவது:

திராவிட மாடல் அரசின் திட்டங்களால் தமிழ்நாடு மகிழ்ச்சியாக இருக்கிறது. அதனால் தான் நானும் மகிழ்ச்சியாக இருக்கிறேன். குறைகள் காது கொடுத்து கேட்கப்படுகிறது, தீர்க்கப்படுகிறது என்று மக்கள் மனநிறைவாக இருக்கிறார்கள்.

திராவிட மாடல் ஆட்சியில் வறுமை, பட்டினிச் சாவுகள், பணவீக்கம், பெரிய ஜாதி மோதல்கள், மதக் கலவரங்கள் இல்லை. சமூகத்தை பின்னோக்கித் தள்ளும் தீயவை இல்லவே இல்லை என்ற சூழ்நிலையை உருவாக்கி இருக்கிறோம்.