ரூ.13,600 கோடியில் புதுவை பட்ஜெட் தாக்கல்

மகளிர் உதவித்தொகை ரூ.2,500-ஆக உயர்வு; கல்லூரி மாணவர்களுக்கு மாதம் ரூ.1,000 அறிவிப்பு

- 

புதுச்சேரி, மார்ச் 12: புதுவை மாநிலத்தில் ஏழைக் குடும்பத் தலைவிகளுக்கு வழங்கப்படும் ரூ.1,000 மாதாந்திர உதவித்தொகை ரூ.2,500-ஆக உயர்த்தி வழங்கப்படும்; கல்லூரி மாணவர்களுக்கு மாதம் ரூ.1,000 ஊக்குவிப்புத் தொகையாக வழங்கப்படும் என்று அந்த மாநில நிதிநிலை அறிக்கையில் தெரிவிக்கப்பட்டது.

புதுவை சட்டப்பேரவையில் 2025-26ஆம் ஆண்டுக்கான நிதிநிலை அறிக்கையை நிதித் துறை பொறுப்பு வகிக்கும் முதல்வர் என். ரங்கசாமி புதன்கிழமை தாக்கல் செய்தார்.

அதன்படி, ரூ.13,600 கோடிக்கான நிதிநிலை அறிக்கையில் இடம்பெற்றுள்ள முக்கிய திட்டங்களின் விவரம்:

மகளிர் உதவித்தொகை ரூ.2,500-ஆக உயர்வு: புதுச்சேரியில் 21 வயது முதல் 55 வயது வரை அரசின் எவ்வித மாதாந்திர உதவித்தொகையும் பெறாத ஏழை குடும்பத் தலைவிகளுக்கு உதவித்தொகை ரூ.1,000 என்பதிலிருந்து ரூ.2,500-ஆக உயர்த்தப்படுகிறது.

அரசு மகளிர் குழந்தைகள் மேம்பாட்டுத் துறை மூலம் ஓய்வூதியம் பெறும் அனைவருக்கும் தலா ரூ.500 உயர்த்தப்படுகிறது.