இருதரப்பு உறவின் புதிய அத்தியாயம்

குடியரசு துணைத் தலைவரின் முதல் இலங்கைப் பயணம்

- நமது சிறப்பு நிருபர்

இந்திய குடியரசு துணைத் தலைவர் சி.பி. ராதாகிருஷ்ணன் ஏப்ரல் 19, 20 ஆகிய தேதிகளில் இலங்கைக்கு அரசுமுறைப் பயணம் மேற்கொள்ளவிருக்கிறார். அதிலும், குடியரசு துணைத் தலைவரான பிறகு சி.பி. ராதாகிருஷ்ணன் இலங்கைக்கு மேற்கொள்ளும் முதலாவது பயணம் என்பதாலும், அவர் தமிழ்நாட்டைச் சேர்ந்தவர் என்பதாலும் இந்தப் பயணம் இரு நாடுகளிலும் மிகுந்த எதிர்பார்ப்பை ஏற்படுத்தியுள்ளது.

இதற்கு முன்பு, 2000-ஆம் ஆண்டு அக்டோபரில் இந்தியாவின் அப்போதைய குடியரசு துணைத் தலைவர் (கிருஷண் காந்த்) இலங்கை முன்னாள் பிரதமர் சிறிமாவோ பண்டாரநாயக்கவின் இறுதிச் சடங்குக்காக இலங்கைக்குச் சென்றார்.

இரண்டு தெற்காசிய அண்டை நாடுகளுக்கும் இடையிலான இருதரப்பு உறவில் இந்திய குடியரசு துணைத் தலைவரின் இலங்கைக்கான அரசுமுறைப் பயணம் திருப்புமுனையை ஏற்படுத்தக்கூடும் என்று சர்வதேச அரசியல் நோக்கர்கள் கருதுகின்றனர்.

அந்த வகையில் சி.பி. ராதாகிருஷ்ணனின் இலங்கைப் பயணம், வெறும் சம்பிரதாய நிகழ்வாக மட்டுமன்றி இந்தியாவிலும் இலங்கையிலும் அரசியல் சூழல்கள் மாறிவரும் காலகட்டத்தில், மிகச் சிறந்த ராஜீய ரீதியிலான ஒருங்கிணைப்பாகவும் கருதப்படுகிறது.

இலங்கையில் தங்கியிருக்கும் இரண்டு நாள்களிலும், குடியரசு துணைத் தலைவர் சி.பி. ராதாகிருஷ்ணன் தனது முதல் நாள் அலுவலிலேயே (ஞாயிற்றுக்கிழமை) இலங்கை அதிபர் அநுர குமார திசாநாயக்க, பிரதமர் ஹரிணி அமரசூரிய ஆகியோருடன் இருதரப்பு பேச்சுவார்த்தைகளை நடத்தவுள்ளார்.

இதைத் தொடர்ந்து, இலங்கை எதிர்க்கட்சித் தலைவர் சஜித் பிரேமதாசா மற்றும் பல்வேறு அரசியல் கட்சிகளின் தலைவர்களையும் குடியரசு துணைத் தலைவர் சந்திக்கவுள்ளார். இத்தகைய உயர்நிலை சந்திப்புகள் நீங்கலாக, தனது பயணத்தின்போது 'தமிழன்' பத்திரிகை ஆசிரியர் சிவராஜ், அகில இலங்கை கம்பன் கழக நிறுவனர் இலங்கை ஜெயராஜ் மற்றும் இலங்கையின் வடக்கு, கிழக்கு மற்றும் மலையகப் பகுதிகளைச் சேர்ந்த தமிழ்ச் சமூகங்களைப் பிரதிநிதித்துவப்படுத்தும் தலைவர்களையும் குடியரசு துணைத் தலைவர் சந்திக்க உள்ளார்.