நாடாளுமன்றத்தில் நீடிக்கும் அமளி: மேலும் 3 மசோதாக்கள் நிறைவேற்றம்

பிகார் வாக்காளர் பட்டியல் சிறப்பு தீவிர திருத்தம் குறித்து விவாதம் கோரி, நாடாளுமன்றத்தில் எதிர்க்கட்சிகள் வியாழக்கிழமையும் கடும் அமளியில் ஈடுபட்டன. அமளிக்கு மத்தியில் மேலும் 3 மசோதாக்கள் நிறைவேற்றப்பட்டன.

- 

புது தில்லி, ஆக. 7:

கடந்த புதன்கிழமை இதேபோல் அமளிக்கு இடையே 2 மசோதாக்கள் நிறைவேற்றப்பட்டிருந்தன.

மக்களவை வியாழக்கிழமை காலையில் கூடியதும், பிகார் வாக்காளர் பட்டியல் திருத்தம் குறித்து விவாதம் கோரியும், இந்த நடவடிக்கையை திரும்பப் பெற வலியுறுத்தியும் எதிர்க்கட்சி எம்.பி.க்கள் முழக்கமிட்டனர். எதிர்ப்பு வாசக அட்டைகளுடன் அவையின் மையப் பகுதியில் முற்றுகையிட்டனர்.

அப்போது, எதிர்க்கட்சிகளை சாடிய அவைத் தலைவர் ஓம் பிர்லா, 'ஜனநாயக விதிமுறைகளுக்குப் புறம்பாக நீங்கள் (எதிர்க்கட்சிகள்) திட்டமிட்டு அலுவல்களை முடக்குகிறீர்கள். உங்களின் நடத்தையை, நாட்டு மக்கள் பார்த்துக்கொண்டுதான் உள்ளனர்' என்றார். அமளிக்கு இடையே கேள்வி நேரத்தை நடத்த அவர் முயற்சித்தார். ஆனால், கூச்சல்-குழப்பம் நீடித்ததால் அவை அலுவல்கள் மதியம் 12 மணிக்கு ஒத்திவைக்கப்பட்டன.