கொடுப்பது திமுக அரசு; எடுப்பது மத்திய அரசு

முதல்வர் மு.க. ஸ்டாலின்

- 

'மக்களுக்காக நிதி கொடுத்தால் அது திமுக அரசு; மக்களிடமிருந்து அதை எடுத்துக் கொண்டால் அது மத்திய பாஜக அரசு என்பதை தமிழக மக்கள் உணர்ந்துள்ளனர்' என்று முதல்வர் மு.க. ஸ்டாலின் தெரிவித்தார்.

மதுரை உத்தங்குடியில் சனிக்கிழமை நடைபெற்ற திமுக தென் மண்டல வாக்குச் சாவடி முகவர்கள், குழு உறுப்பினர்கள் கலந்தாய்வுக் கூட்டத்தில் முதல்வர் பேசியதாவது:

2019-ஆம் ஆண்டு முதல் அனைத்துத் தேர்தல்களிலும் திமுக தொடர்ந்து வெற்றி பெற்று வருகிறது. 2024-இல் நடைபெற்ற மக்களவைத் தேர்தலில் இந்தியாவின் எந்த மாநிலத்திலும் இல்லாத வகையில் 40-க்கு 40 தொகுதிகளையும் திமுக கூட்டணி வென்றது.

அப்போதைய நிலையைவிட தற்போது ஏராளமான திட்டங்களை திமுக அரசு நிறைவேற்றியுள்ளது. மக்களின் கோரிக்கைகள் மட்டுமல்லாமல், மக்களே ஆச்சரியப்படும் வகையில் பல புதிய திட்டங்களும் நிறைவேற்றப்பட்டன. எனவே, வருகிற சட்டப்பேரவைத் தேர்தலில் திமுக கூட்டணிக்கு மிகப்பெரிய வெற்றி உறுதி. திமுக தனிப்பெரும்பான்மையுடன் ஆட்சி அமைக்கும் என்பதில் எந்தச் சந்தேகமும் கிடையாது. திமுக கூட்டணி 200 தொகுதிகளில் வெல்வது நிச்சயம்; 200-க்கும் அதிகமான தொகுதிகளில் வெல்ல வேண்டும் என்பதே லட்சியம்.