தாய் மரத்தைத் தாங்கும் விழுதுகள்!

பெற்றோர் அல்லது மூதாதையர்களின் மரபணுக்கள் மூலம் பெற்ற அறிவையும், ஆற்றலையும் வேர்களாகக் கொண்டு வளர்பவன் மனிதன். அவனுடைய முதுமைக் காலத்தில், ஆலமரத்தின் விழுதுகள் மரத்தைத் தாங்கிப் பிடிப்பதுபோல், அவனுடைய பிள்ளைகள் அவனைத் தாங்கிப் பிடிக்க வேண்டும்.

- மா.கல்யாண மோகன்

இயற்கை என்னும் பேராற்றலின் படைப்பில், பிரபஞ்சத்தில் பல வகையான உயிரினங்கள் தோற்றுவிக்கப்பட்டன. அவை புல், பூண்டு, செடிகொடிகள், மரங்கள், ஊர்வன, பறப்பன, விலங்குகள், நீர்வாழ் உயிரினங்கள் என்ற வரிசையில் கடைசியாகத் தோன்றிய உயிரினமே மனிதன் எனப்பட்டவன். அவை ஓரறிவு, ஈரறிவு, மூவறிவு, நான்கறிவு, ஐந்தறிவு என்று வகைப்படுத்தப்படும். இந்த வரிசையில், மனிதன் மட்டுமே ஆறறிவு படைத்த உயிரினம். அந்த ஆறாவது அறிவுக்கு பகுத்தறிவு என்று பெயர். பகுத்தறிவு என்றால், பகுத்து அறிதல் என்னும் தன்மையைக் குறிப்பதாகும்.

மனிதனைப் போலவே மற்ற உயிரிகளுக்கும் சில அடிப்படை அம்சங்கள் பொதுவானவையே. பசி, தாகம், பயம், கோபம், போட்டி, சண்டை, ஆசை போன்றவை அதில் அடங்கும். ஆனால், தேவைகளைப் பொருத்து, மனிதனைப் போன்றே மற்ற உயிரினங்களிலும் இந்த தன்மைகள் வெளிப்படும். அவற்றுக்கு நல்லது எது, தீயது எது என பகுத்துப்பார்த்து செயல்படும் அறிவாற்றல் கிடையாது.

ஆனால், நல்லது எது, தீயது எது என்று பிரித்துப் பார்க்கக் கூடிய ஆறாம் அறிவை மனிதன் பயன்படுத்தும்போது, அதே ஆறாம் அறிவு அந்த செயல்களினால் ஏற்படும் பின்விளைவுகளையும், பிரித்துப் பார்த்து செயல்பட அவனுக்கு உதவுகிறது. அந்த ஆறாம் அறிவு சரியான வழியில் செயல்படுத்தப்படும்போது அதனால் விளைவது நன்மை என்றும், தவறான வழியில் பயன்படுத்தப்படும்போது அதனால் விளைவது தீமை என்றும் உறுதியாகிறது.

ஆரம்பநிலை உயிர்களில், இடப்பெயர்ச்சிக்கு உள்ளான உயிரினத்தின் ஜீவகாந்தமே திணிவு கொண்ட ரசாயனமாக மாற்றம் பெற்று, அவற்றுக்கு ஏற்பட்ட ஆற்றல் குறைவை ஈடு செய்துகொள்ள உதவியது. இத்தகைய சிறப்புப் பெற்ற இனம் தாவரம் ஆகும். சில தொடர்நிலை உயிர்கள், தாவரங்களைச் சார்ந்து, அவற்றை உண்டு வாழும் நிலை ஏற்பட்டபோது பாக்டீரியாக்கள் என்ற விலங்கினம் உருவானது. இவை போன்ற ஓரறிவு உயிரினங்கள் ஒன்றையொன்று விழுங்கி வாழும் நிலை உருவானபோது அவை 'அமீபா' என்று அழைக்கப்பட்ட 'உண்ணி' இனமாக உருவானது.