தஞ்சையில் தூய்மைப் பணியாளர்கள் காத்திருப்புப் போராட்டம்

கடனுக்காக பிடித்தம் செய்த ரூ. 10.12 கோடி தொகையைக் கூட்டுறவு கடன் சங்கத்தில் செலுத்தாமல் முறைகேடு செய்யப்பட்டதாகக் கூறியும், இதுதொடர்பாக நடவடிக்கை எடுக்கக் கோரியும் தஞ்சாவூர் மாநகராட்சி அலுவலக வளாகத்தில் சிஐடியு தஞ்சை மாவட்ட ஊரக வளர்ச்சி உள்ளாட்சி துறை ஊழியர் சங்கத்தினர் செவ்வாய்க்கிழமை காத்திருப்புப் போராட்டத்தில் ஈடுபட்டனர்.

- 

தஞ்சாவூர், ஏப் 8:

தஞ்சாவூர் கூட்டுறவு கடன் சங்கத்தில் மாநகராட்சி நிரந்தர தூய்மைப் பணியாளர்கள் பெற்ற கடனுக்காக பல ஆண்டுகளாக மாத ஊதியத்தில் பிடித்தம் செய்யப்பட்டது. இதில், பணியில் உள்ள தொழிலாளர்கள், ஓய்வு பெற்ற தொழிலாளர்கள் உள்ளிட்டோரிடம் பிடித்தம் செய்யப்பட்ட ரூ. 10.12 கோடியை கடன் சங்கத்தில் செலுத்தாமல் முறைகேட்டில் ஈடுபட்டவர்கள் மீது நடவடிக்கை எடுக்க வேண்டும். இதுதொடர்பாக 2024, நவம்பர் 22 ஆம் தேதி சிஐடியு தலைவர்களிடம் மாநகராட்சி ஆணையர் அளித்த உறுதியளிப்பின்படி கடன் நிலுவை இல்லா சான்றிதழ் மற்றும் தொழிலாளர்களிடம் கூடுதலாக பிடித்தம் செய்த தொகையை வட்டியுடன் வழங்க வேண்டும் என்பன உள்ளிட்ட கோரிக்கைகளை வலியுறுத்தி இப்போராட்டம் நடைபெற்றது.