வேலைவாய்ப்புகளுக்கு ஒரு திறவுகோல்!

நாம் படிக்கும் அறிவியல் பாடங்களில், நம் அன்றாட வாழ்வின் அனைத்துத் துறைகளையும் இணைக்கும் ஒரு முக்கியமான அறிவியல் வேதியியலாகும்.

- 

நம்மைச் சுற்றி நிகழும் ஒவ்வொரு நிகழ்விலும் வேதியியலின் தாக்கமும் மற்றும் அதன் பங்களிப்பும் முக்கியத்துவம் வாய்ந்ததாக உள்ளது. குறிப்பாக, நாம் சுவாசிக்கும் காற்று, அருந்தும் நீர், உண்ணும் உணவு முதல், நாம் உடுத்தும் உடை, நாம் பயன்படுத்தும் அனைத்து வகையான பொருள்கள், நோய்களுக்கு எடுத்துக்கொள்ளும் மருந்துகள் வரை என அனைத்திலும் வேதியியல் நிரம்பி உள்ளது. ஆகவே, இவை அனைத்தும் உருவாக காரணமானதும், ஆதாரமானதும் வேதியியலே.

இன்றைய சூழ்நிலையில், வேதியியல் பாடம் கடினமானது என்ற தவறான எண்ணத்தால் பல மாணவர்கள் அதைத் தவிர்க்கின்றனர். அதற்குப் பதிலாக, எந்தப் பாடப் பிரிவில் படித்தால் எளிதாகப் பட்டம் பெறலாம் என்று எண்ணி அதிக வேலைவாய்ப்பு இல்லாத பாடப் பிரிவுகளைத் தேர்வு செய்து, பின்னர் வேலைவாய்ப்பு இல்லாமல் சிரமப்படுகின்றனர். ஆனால், உண்மையில் அபரிமிதமான வேலைவாய்ப்புகளை வழங்கக் கூடியது வேதியியல் படிப்பே. பிளஸ் 2 வகுப்புக்குப் பிறகு எந்தப் படிப்பைத் தேர்ந்தெடுக்க வேண்டும் என்பது குறித்து குழப்பத்தில் இருக்கும் மாணவர்களுக்கு, தெளிவான வழிகாட்டியாக விளங்கும் பாடப் பிரிவாகவே வேதியியல் உள்ளது.