நியாயவிலைக் கடை பணியாளர்கள் வேலைநிறுத்தம்

1000 ரேஷன் கடைகள் அடைப்பு

- 

சிதம்பரம்/நெய்வேலி, ஏப். 22: தமிழ்நாடு நியாயவிலைக் கடை பணியாளர்கள் சங்கம் சார்பில், 30 அம்சக் கோரிக்கைகள் குறித்து பேச்சுவார்த்தை நடத்த வேண்டும் என்ற கோரிக்கைகளை வலியுறுத்தி செவ்வாய்க்கிழமை முதல் மூன்று நாட்கள் தொடர் வேலைநிறுத்தத்தில் ஈடுபட்டுள்ளனர்.

பொது விநியோக திட்டத்தின் கீழ் கூட்டுறவுத் துறையில் பணிபுரியும் நியாயவிலைக் கடை பணியாளர்களின் கோரிக்கைகளான குடும்ப அட்டைதாரர்களுக்கு விரல் ரேகை பதிவு சரிபார்ப்புக்கு மீண்டும் 40 சதவீதம் நடைமுறைப்படுத்தவேண்டும், விற்பனை முனையத்தின் இணையதள சேவை மேம்படுத்தப்பட வேண்டும்.

அனைத்து நியாயவிலைக் கடைகளுக்கும் எடையாளர் நியமனம் செய்ய வேண்டும். பொது விநியோகத் திட்டத்தை தனித் துறையாக அறிவிக்க வேண்டும். கல்வித் தகுதிக்கு ஏற்ப ஊதியம் வழங்க வேண்டும். நியாயவிலைக் கடை விற்பனையாளர்களுக்கு பிளஸ் 2 கல்வித் தகுதியாகும்.