ஊரகப் பகுதிகளில் ரூ.800 கோடியில் உயர்நிலைப் பாலங்கள்

ஊரகப் பகுதிகளில் உள்ள சாலைகளில் ரூ.800 கோடியில் உயர்நிலைப் பாலங்கள் கட்டப்படும் என்று ஊரக வளர்ச்சித் துறை அமைச்சர் ஐ.பெரியசாமி கூறினார்.

- 

சென்னை, மார்ச் 26:

ஊரக வளர்ச்சித் துறை மானியக் கோரிக்கை மீதான விவாதத்துக்குப் பதிலளித்து அமைச்சர் ஐ.பெரியசாமி வெளியிட்ட அறிவிப்புகள்:

ஊரக மக்களுக்கு சிறப்பான சேவை வழங்குவதற்காக பழுதடைந்த நிலையில் உள்ள 500 ஊராட்சி அலுவலகக் கட்டடங்கள் ரூ.157 கோடியில் புதிதாக கட்டப்படும். ஊரகப் பகுதிகளில் உள்ள அங்கன்வாடி மையங்களுக்கு நிலையான கட்டடங்களின் தேவை உள்ளது. 500 அங்கன்வாடி மையங்களுக்கு புதிய கட்டடங்கள் ரூ.87 கோடியில் கட்டப்படும்.

ரூ.50 கோடியில் சுற்றுச்சுவர்:

ஊரகப் பகுதிகளில் மக்கள் உணவு தானியங்கள் மற்றும் அத்தியாவசியப் பொருள்களை எளிதில் பெறும் பொருட்டு 500 முழுநேர நியாயவிலைக் கடைகள் ரூ.61 கோடியில் கட்டப்படும்.

பள்ளிக் குழந்தைகளின் பாதுகாப்பை உறுதி செய்யும் வகையில் 500 ஊராட்சி ஒன்றிய ஆரம்ப, நடுநிலை மற்றும் அரசு உயர்நிலை, மேல்நிலைப் பள்ளிகளுக்குச் சுற்றுச்சுவர் ரூ.50 கோடியில் கட்டப்படும்.