பாகிஸ்தானுக்கு ரூ.736 கோடி நஷ்டம்

சாம்பியன்ஸ் கோப்பை கிரிக்கெட் போட்டியை நடத்திய பாகிஸ்தான் கிரிக்கெட் வாரியம், லாபத்துக்கு பதிலாக நிதி மற்றும் தளவாட ரீதியாக ரூ.736 கோடி நஷ்டத்தை சந்தித்துள்ளது.

- 

புது தில்லி, மார்ச் 18:

ஐசிசி-யின் 9-ஆவது சாம்பியன்ஸ் கோப்பை கிரிக்கெட் போட்டி, பாகிஸ்தான் மற்றும் துபையில் கடந்த மாதம் 19 முதல் இம்மாதம் 9-ஆம் தேதி வரை நடைபெற்றது. இறுதி ஆட்டத்தில் நியூஸிலாந்தை வீழ்த்திய இந்தியா, 3-ஆவது முறையாக கோப்பையை வென்றது.

கோடிகளில் செலவு...
பொருளாதார சிக்கலில் இருக்கும் பாகிஸ்தான், ஐசிசி போட்டியை எவ்வாறு நடத்தப்போகிறது என்ற விவாதங்கள் இருந்தன. 29 ஆண்டுகளுக்குப் பிறகு தனது மண்ணில் ஐசிசி போட்டி நடைபெறும் நிலையில் அதற்காக பாகிஸ்தான் வாரியம் பெரும் திட்டங்கள் வகுத்தது. கராச்சி, ராவல்பிண்டி, லாகூர் மைதானங்களை நூற்றுக்கணக்கான கோடிகள் செலவழித்து சீரமைத்தது.

போட்டி தொடங்கும் நாள் நெருங்கிய நிலையிலும், மைதானத்தின் சீரமைப்புப் பணிகள் நிறைவடையாத நிலை காணப்பட்டு, பின்னர் துரித கதியில் அந்தப் பணிகள் நிறைவடைந்தன.

சாம்பியன்ஸ் கோப்பை போட்டியை நடத்த, பாகிஸ்தான் மொத்தமாக சுமார் ரூ.866 கோடி ரூபாய் வரை செலவழித்தது. இதில் ஏறத்தாழ ரூ.502 கோடி வரை 3 மைதானங்களை மறுசீரமைப்பதற்காக மட்டுமே பயன்படுத்தியது. எஞ்சிய ஒதுக்கீட்டில் ரூ.346 கோடி வரை போட்டி ஏற்பாடுகளுக்காக செலவிட்டது.