கனடாவின் புதிய பிரதமர் மார்க் கார்னி

கனடாவின் புதிய பிரதமராக பொருளாதார நிபுணரும் அந்த நாட்டு மத்திய வங்கியின் முன்னாள் ஆளுநருமான மார்க் கார்னி (59) பொறுப்பேற்கவிருக்கிறார்.

- 

டொரன்டோ, மார்ச் 10:

ஹார்வர்டு பல்கலைக்கழகம் (அமெரிக்கா), ஆக்ஸ்ஃபோர்டு பல்கலைக்கழகம் (பிரிட்டன்) ஆகியவற்றில் பட்டப்படிப்புகளை முடித்த மார்க் கார்னி, அமெரிக்காவின் கோல்ட்மன் சாஷ்ஸ் நிறுவனத்தில் 13 ஆண்டுகள் பணியாற்றினார்.

பின்னர் கனடா நாட்டின் மத்திய வங்கியான பேங்க் ஆஃப் கனடாவில் துணை ஆளுநராக 2003-ஆம் ஆண்டில் பொறுப்பேற்ற அவருக்கு, ஓராண்டு கழித்து கனடா அரசின் நிதியமைச்சகத்தில் முதுநிலை துணை இணையமைச்சர் என்ற நியமனப் பொறுப்பு வழங்கப்பட்டது.

அந்த அமைச்சகத்தில் பணியாற்றிக் கொண்டிருந்தபோதே 2007-ஆம் ஆண்டு கனடா மத்திய வங்கியின் ஆளுநராக மார்க் கார்னி நியமிக்கப்பட்டார். அந்த ஆண்டு நிலவிய சர்வதேச பொருளாதார நெருக்கடியால் கனடா மோசமாக பாதிக்கப்படுவதில் இருந்து நாட்டைப் பாதுகாத்ததில் கார்னி முக்கிய பங்கு வகித்ததாக பாராட்டப்படுகிறது.

2013-ஆம் ஆண்டு வரை கனடா மத்திய வங்கியின் ஆளுநராக இருந்த மார்க் கார்னியை, பிரிட்டனின் மத்திய வங்கியான பேங்க் ஆஃப் இங்கிலாந்தின் ஆளுநராக அப்போதைய பிரிட்டன் நிதியமைச்சர் ஜார்ஜ் அஸ்பார்ன் நியமித்தார்.

கடந்த 1694-ஆம் ஆண்டில் உருவாக்கப்பட்ட பிரிட்டன் மத்திய வங்கியின் ஆளுநராக நியமிக்கப்பட்ட பிரிட்டனைச் சேராத முதல் நபர் மார்க் கார்னி என்பது குறிப்பிடத்தக்கது.